കൊച്ചി: മുന്‍ മന്ത്രി തോമസ് ചാണ്ടി ഡയറക്ടറായ കമ്പനി റിസോര്‍ട്ടിനു വേണ്ടി നിലം നികത്തിയെന്ന ആരോപണത്തിനു കാരണമായ രേഖകള്‍ ലഭിക്കണമെന്നാവശ്യപ്പെട്ട് ഹൈക്കോടതിയില്‍ ഹരജി. റിസോര്‍ട്ട് ഉടമകളായ വാട്ടര്‍ വേള്‍ഡ് ടൂറിസം കമ്പനി നല്‍കിയ ഹരജിയില്‍ ഹൈക്കോടതി ആലപ്പുഴ ജില്ലാ കലക്ടറുടെ നിലപാട് തേടി. കമ്പനി മാനേജിങ് ഡയറക്ടര്‍ മാത്യു ജോസഫാണ് ഹൈക്കോടതിയെ സമീപിച്ചത്.
ആരോപണത്തെത്തുടര്‍ന്ന് കലക്ടര്‍ തെളിവെടുപ്പിന് നോട്ടിസ് നല്‍കിയിരുന്നു. ലീലാമ്മ ഈശോയെന്ന വ്യക്തിയുടെ ഭൂമിയിലെ നിലം നികത്തിയതുമായി ബന്ധപ്പെട്ടാണ് നോട്ടിസ് നല്‍കിയതെന്നും പുറം ബണ്ടിലെ ഭൂമി കമ്പനിയുടേതല്ലെന്നും ഹരജിയില്‍ പറയുന്നു. രേഖകള്‍ ലഭ്യമാക്കണമെന്നാവശ്യപ്പെട്ട് ജില്ലാ കലക്ടര്‍ക്ക് അപേക്ഷ നല്‍കിയെങ്കിലും റിപ്പോര്‍ട്ടിന്റെ പകര്‍പ്പാണ് ലഭിച്ചതെന്ന് ഹരജിയില്‍ ചൂണ്ടിക്കാട്ടിയിട്ടുണ്ട്.