കോഴിക്കോട്: ട്രാഫിക് പൊലിസുകാരന്റെ ഡ്യൂട്ടി തടസപ്പെടുത്തിയെന്നാരോപിച്ച് സ്വകാര്യ ബസ് ഡ്രൈവറെയും യാത്രക്കാരനെയും അറസ്റ്റ് ചെയ്ത് ജയിലിടച്ചതിനെതിരേ പ്രതിഷേധം ശക്തം.
പൊലിസ് നടപടിയില്‍ പ്രതിഷേധിച്ച് ഇന്ന് പണിമുടക്ക് നടത്തുമെന്ന് ഒരുവിഭാഗം ബസ് തൊഴിലാളികള്‍ അറിയിച്ചു. കോഴിക്കോട്-എടവണ്ണപ്പാറ റൂട്ടിലോടുന്ന സഫ ബസിലെ ഡ്രൈവര്‍ പൂവാട്ടുപറമ്പ് സ്വദേശി നടുവിലക്കണ്ടി അബ്ദുല്‍ സലാം (32), യാത്രക്കാരനായ പെരുമണ്ണ സ്വദേശി പറമ്പടി മീത്തല്‍ അഭീഷ് (33) എന്നിവരെയാണ് മെഡിക്കല്‍ കോളജ് പൊലിസ് അറസ്റ്റ് ചെയ്തത്. പൊലിസ് നടപടിക്കെതിരേ കോഴിക്കോട് മാവൂര്‍, എടവണ്ണപ്പാറ, അരീക്കോട്, ചെറുവാടി, പെരുമണ്ണ, കുറ്റിക്കടവ് റൂട്ടുകളിലെ ഒരുവിഭാഗം ബസ് തൊഴിലാളികളാണ് പണിമുടക്ക് പ്രഖ്യാപിച്ചത്. ഇന്നലെ രാവിലെ എട്ടേകാലോടെയാണ് കേസിനാസ്പദമായ സംഭവം.
ബസ് കോഴിക്കോട്ടുനിന്ന് മെഡിക്കല്‍ കോളജില്‍ എത്തിയപ്പോള്‍ തുടരെ ഹോണ്‍ മുഴക്കുകയായിരുന്നു.
ഇതോടെ ഡ്യൂട്ടിയിലുണ്ടായിരുന്ന ട്രാഫിക് പൊലിസുകാരന്‍ മധു ബസ് ഡ്രൈവറോട് ലൈസന്‍സ് ആവശ്യപ്പെടുകയും ട്രിപ്പ് റദ്ദാക്കാന്‍ നിര്‍ദേശിക്കുകയുമായിരുന്നു.
തുടര്‍ന്ന് ബസിലെ സ്ത്രീകളടക്കമുള്ള സ്ഥിര യാത്രക്കാര്‍ തങ്ങളെ വഴിയിലിറക്കിവിടരുതെന്ന് പറഞ്ഞ് രംഗത്തെത്തി.
തുടര്‍ന്ന് പൊലിസ് പിന്‍വാങ്ങിയെങ്കിലും ബസിലെ യാത്രക്കാരന്‍ പൊലിസുകാരനോട് തട്ടിക്കയറുകയായിരുന്നു. രംഗം വഷളായതോടെ പെലിസ് ബസ് ഡ്രൈവര്‍ അബ്ദുല്‍ സലാമിനെയും യാത്രക്കാരന്‍ അഭീഷിനെയും കസ്റ്റഡിയിലെടുത്ത് മെഡിക്കല്‍ കോളജ് സ്‌റ്റേഷനിലേക്കു കൊണ്ടുപോവുകയും പിന്നീട് കോടതിയില്‍ ഹാജരാക്കി റിമാന്‍ഡ് ചെയ്യുകയുമായിരുന്നു.