ഇസ്‌ലാമാബാദ്: ആണവശേഷിയുള്ള ഉപരിതല ബാലിസ്റ്റിക് മിസൈലിന്റെ പരീക്ഷണം വിജയകരമെന്ന് പാകിസ്താന്‍. അബാബീല്‍ എന്നു പേരിട്ട മിസൈലിന് 2,200 കി.മി ദൂരപരിധിയാണ് ശേഷി. മള്‍ട്ടിപ്പിള്‍ റീ എന്‍ട്രി വെഹിക്കിള്‍ (എം.ഐ.ആര്‍.വി) സാങ്കേതികവിദ്യ ഉപയോഗിക്കുന്നതുവഴി നിരവധി തവണ ആയുധശേഖരം കൊണ്ടുപോകാന്‍ കഴിയുമെന്ന് ഇന്റര്‍ സര്‍വിസസ് പബ്ലിക് റിലേഷന്‍സ് (ഐ.എസ്.പി.ആര്‍) വാര്‍ത്താക്കുറിപ്പില്‍ അറിയിച്ചു.
വിവിധ ഡിസൈനുകളും സാങ്കേതിക വശങ്ങളുടെ പ്രവര്‍ത്തനവും നിരീക്ഷിക്കാനാണു പരീക്ഷണം. ആണവായുധം കൊണ്ടുപോകാന്‍ ശേഷിയുള്ള അബാബീലിന് കൃത്യതയോടെ നിരവധി ലക്ഷ്യസ്ഥാനങ്ങളെ നേരിടാന്‍ കഴിയും. മുങ്ങിക്കപ്പലില്‍നിന്നു വിക്ഷേപിക്കാന്‍ കഴിയുന്ന ക്രൂയിസ് മിസൈല്‍ ബാബര്‍ മൂന്ന് ഡിസംബര്‍ ഒന്‍പതിനു പാകിസ്താന്‍ വിജയകരമായി പരീക്ഷിച്ചതായി അവകാശപ്പെട്ടിരുന്നു. എന്നാല്‍ ഈ അവകാശവാദം പിന്നീട് ഇന്ത്യ തള്ളുകയും ചെയ്തു.