കാക്കനാട്: ജനങ്ങളെ ദുരിതത്തിലാക്കിയ നോട്ടു നിരോധനത്തില്‍ രാജ്യത്തെ മുഴുവന്‍ സംസ്ഥാനങ്ങളില്‍ കര്‍ഷകരെയും ജനങ്ങളെയും രക്ഷിക്കാന്‍ പലപദ്ധതികളും ആവിഷ്‌കരിച്ചെങ്കിലും കേരള സര്‍ക്കാര്‍ യാതൊരു വിധആശ്വാസ നടപടികളും സ്വീകരിച്ചില്ലെന്ന് മുന്‍ മുഖ്യമന്ത്രി ഉമ്മന്‍ചാണ്ടി.
കേന്ദ്ര,സംസ്ഥാന സര്‍ക്കാറുകളുടെ ജനദ്രോഹ നയങ്ങളില്‍ പ്രതിഷേധിച്ച് യു.ഡി.എഫ് സംഘടിപ്പിച്ച കലക്ടറേറ്റ് പിക്കറ്റിങിന്റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം.
രാജ്യം ഭരിക്കുന്ന നരേന്ദ്ര മോദിക്ക് ബി.ജെ.പിയുടെ അജണ്ടയാണെങ്കില്‍ കേരളത്തില്‍ ഇടത് മുന്നണി ജനങ്ങളെ മറന്നുള്ള രാഷ്ട്രീയ അജണ്ടയാണ് നടപ്പിലാക്കുന്നത്. മുന്‍ സര്‍ക്കാര്‍ ഭരണം വിട്ടുമ്പോള്‍ 16.5 ലക്ഷം ടണ്‍ അരിയുണ്ടയിരുന്നു. കഴിഞ്ഞ അഞ്ചു വര്‍ഷം അരി ഇല്ലാതെ ഒരു ദിവസം പോലും റേഷന്‍കട മുടങ്ങുകയോ അരി വിതരണം ഇല്ലാതിരിക്കുകയോ ഉണ്ടായിട്ടില്ലെന്ന് ഉമ്മന്‍ചാണ്ടി വ്യക്തമാക്കി.
12.9 ലക്ഷമുണ്ടായിരുന്ന ക്ഷേമ പെന്‍ഷന്‍കാരുടെ 34 ലക്ഷമായി ഉയര്‍ന്നത് യു.ഡി.എഫ് ഭരണത്തിലാണ്. ഇപ്പോള്‍ എങ്ങനെ കുറക്കാമെന്നാണ് സര്‍ക്കാര്‍ ആലോചിക്കുന്നത്. യു.ഡി.എഫ് ഭരണത്തില്‍ കെ.എസ്.ആര്‍.ടി.സിയില്‍ ഒരു മാസം പോലും ശമ്പളം മുടങ്ങിയിട്ടില്ലെന്നും ഉമ്മന്‍ ചാണ്ടി പറഞ്ഞു.
ഉദ്ഘാടനത്തിന് ശേഷം പ്രവര്‍ത്തകര്‍ പൊലിസ് ബാരിക്കേഡ് മറിച്ചിടാന്‍ നടത്തിയ ഉന്തിലും തള്ളിലും ഉമ്മന്‍ചാണ്ടിക്ക് നേരിയ പരുക്കേറ്റു. നേതാക്കളുടെ ആഹ്വാനം അംഗീകരിക്കാത്ത പ്രവര്‍ത്തകരെ പിന്തിരിപ്പിക്കുന്നതിനിടെയാണ് അദ്ദേഹത്തിന്റെ കൈയില്‍ ബാരിക്കേടിലെ കമ്പിമുള്ള് കുത്തിക്കേറി പരുക്കേറ്റത്.
ചടങ്ങില്‍ യു.ഡി.എഫ് കണ്‍വീനര്‍ എം.ഒ ജോണ്‍ അധ്യക്ഷത വഹിച്ചു. യു.ഡി.എഫ് കണ്‍വീനര്‍ പി.പി തങ്കച്ചന്‍, പ്രഫ. കെ.വി തോമസ് എം.പി, എം.എല്‍.എമാരായ വി.കെ ഇബ്രാഹിം കുഞ്ഞ്, അനൂബ് ജേക്കബ്, പി.ടി തോമസ്, അന്‍വര്‍ സാദത്ത്, വി.പി സജീന്ദ്രന്‍, ഹൈബി ഈഡന്‍, എല്‍ദോസ് കുന്നപ്പിള്ളി, ജോജി ജോണ്‍, മുന്‍ എം.പി കെ.പി ധനപാലന്‍, മുന്‍ മന്ത്രിമാരായ കെ ബാബു, ഡൊമിനിക് പ്രസന്റേഷന്‍, ഡി.സി.സി പ്രസിഡന്റ് ടി.ജെ വിനോദ്, മുസ്‌ലിം ലീഗ് ജില്ലാ പ്രസിഡന്റ് എം.ബി അബ്ദുള്‍ഖാദര്‍, ജനറല്‍ സെക്രട്ടറി കെ.എം അബ്ദുള്‍ മജീദ്, എന്നിവര്‍ പ്രസംഗിച്ചു.