നീലേശ്വരം: സന്താന സൗഭാഗ്യ നിര്‍വൃതിയില്‍ കരുവാച്ചേരി പതിക്കാല്‍ ചാമുണ്ഡേശ്വരി ക്ഷേത്രത്തില്‍ ഉടയിലിടല്‍ ചടങ്ങ് നടന്നു. ക്ഷേത്രത്തിലെ കളിയാട്ട മഹോത്സവത്തോടനുബന്ധിച്ചാണ് ഉടയിലിടല്‍ ചടങ്ങ് നടന്നത്.
സന്താനഭാഗ്യം ലഭിക്കാത്ത ദമ്പതികള്‍ അതിനായി സന്താന ദായിനിയായ പതിക്കാല്‍ ചാമുണ്ഡിയെ പ്രാര്‍ഥിച്ച് എല്ലാ മാസവും സംക്രമദിവസം ക്ഷേത്ര നടയിലെത്തുന്നു.
തുടര്‍ന്നു കുട്ടികളുണ്ടാകുന്ന ദമ്പതികള്‍ കളിയാട്ട ദിവസം ക്ഷേത്രത്തിലെത്തി ഉറഞ്ഞു കഴിഞ്ഞു നടയിലെത്തുന്ന പതിക്കാല്‍ ചാമുണ്ഡിയുടെ ഉടയാടയില്‍ കുഞ്ഞിനെ കിടത്തും. കുഞ്ഞുമായി ചാമുണ്ഡി മൂന്നു തവണ ക്ഷേത്രത്തിനു വലംവയ്ക്കുന്നു.
തുടര്‍ന്ന് അരിയും കുറിയും നല്‍കി അനുഗ്രഹിക്കുന്നതോടെ ചടങ്ങ് പൂര്‍ത്തിയാകും. എല്ലാ വര്‍ഷവും നിരവധി ദമ്പതികളാണ് ഉടയിലിടല്‍ ചടങ്ങിനായി ഇവിടെ എത്തുന്നത്.