തിരൂരങ്ങാടി: കൊടിഞ്ഞി പുല്ലാണി ഫൈസല്‍ വധക്കേസ് ക്രൈംബ്രാഞ്ച് അന്വേഷണം ഊര്‍ജിതമാക്കി. ഇതിന്റെ ഭാഗമായി ജില്ലാ ക്രൈംബ്രാഞ്ച് ഡിവൈ.എസ്.പി സി.കെ ബാബു, പെരിന്തല്‍മണ്ണ ഡിവൈ.എസ്.പി എം.പി മോഹനചന്ദ്രന്‍, താനൂര്‍ സി.ഐ സി. അലവി, വണ്ടൂര്‍ എസ്.ഐ ചന്ദ്രന്‍, എ.എസ്.ഐമാരായ സജീവ്, സന്തോഷ് പൂതേരി എന്നിവരടങ്ങുന്ന സംഘം ഫൈസല്‍ കൊല്ലപ്പെട്ട കൊടിഞ്ഞി ഫാറൂഖ് നഗറിലെത്തി കൂടുതല്‍ അന്വേഷണം നടത്തി.
ഇന്നലെ ഉച്ചയോടെ സംഭവസ്ഥലത്തെത്തിയ അന്വേഷണ സംഘം മൃതദേഹം കിടന്നിരുന്ന സ്ഥലവും പരിസരങ്ങളും പരിശോധിച്ചു. ഇതിനു മുന്‍പു പൊലിസ് നടത്തിയ അന്വേഷണത്തെ കുറിച്ച് വിലയിരുത്തി. സംഭവത്തിലെ ദൃക്‌സാക്ഷികളെയും പരിസരവാസികളെയും ചോദ്യം ചെയ്തു. സംഭവത്തിന്റെ പ്രഥമഘട്ടംതൊട്ടേയുള്ള കാര്യങ്ങളാണ് അന്വേഷിച്ചുവരുന്നത്. നിലവിലുള്ള അന്വേഷണത്തിനു പുറമേ മുന്‍പു നടത്തിയ അന്വേഷണ റിപ്പോര്‍ട്ടും അതിലെ പാകപ്പിഴവുകളും പരിശോധിക്കും.
ഇസ്‌ലാംമതം സ്വീകരിച്ചതിന്റെ പേരില്‍ 2016 നവംബര്‍ 19നാണ് ഫാറൂഖ് നഗറില്‍വച്ച് ഫൈസല്‍ വെട്ടേറ്റു മരിച്ചത്. മലപ്പുറം ഡിവൈ.എസ്.പി പി.എം പ്രദീപിന്റെ നേതൃത്വത്തിലാണ് കേസന്വേഷണം നടന്നത്. കേസിലെ മുഖ്യസൂത്രധാരനെന്നു പറയപ്പെടുന്ന തിരൂര്‍ മഠത്തില്‍ നാരായണന്‍, തിരൂര്‍ കുട്ടിച്ചാത്തന്‍കാവ് വിപിന്‍ദാസ്, ഗൂഢാലോചനാ സംഘത്തിലെ വള്ളിക്കുന്ന് സ്വദേശി ജയകുമാര്‍ എന്നിവരെ പിടികൂടാന്‍ ബാക്കിയുണ്ട്. രണ്ടുമാസം പൂര്‍ത്തിയായിട്ടും കേസന്വേഷണത്തില്‍ പുരോഗതിയില്ലാത്തതിനാലും പൊലിസ് ഒത്തികളിക്കുന്നതായും ആരോപിച്ച് കഴിഞ്ഞ 19ന് സര്‍വകക്ഷി സമരസമിതി ചെമ്മാട് ടൗണ്‍, കക്കാട് ദേശീയപാത എന്നിവ ഉപരോധിച്ചിരുന്നു.
തുടര്‍ന്നാണ് കേസ് ജില്ലാ ക്രൈംബ്രാഞ്ചിന് കൈമാറിയത്. കൃത്യം നടത്തിയ കേസില്‍ മൂന്നു പേരെയും ഗൂഢാലോചനാ കേസില്‍ എട്ടു പേരെയും നേരത്തെ പൊലിസ് അറസ്റ്റ് ചെയ്തിരുന്നു. ഇവര്‍ കോഴിക്കോട്, തിരൂര്‍ ജയിലുകളില്‍ റിമാന്‍ഡില്‍ കഴിയുകയാണ്.