തലശ്ശേരി: ആര്‍.എസ്.എസ് കണ്ണൂര്‍ ജില്ലാ ശാരീരിക് ശിക്ഷക് പ്രമുഖ് കതിരൂരിലെ ഇളംതോട്ടത്തില്‍ മനോജിനെ കൊലപ്പെടുത്തിയ കേസില്‍ സി.പി.എം കണ്ണൂര്‍ ജില്ലാ സെക്രട്ടറി പി.ജയരാജനുള്‍പ്പെടെയുള്ള കേസിലെ മുഴുവന്‍ പ്രതികളും നാളെ എറണാകുളം സി.ബി.ഐ കോടതി മുന്‍പാകെ ഹാജരാകണം. കേസ് എറണാകുളം സി.ബി.ഐ കോടതിയിലേക്ക് മാറ്റിക്കൊണ്ടുള്ള സുപ്രിം കോടതി ഉത്തരവിനെ തുടര്‍ന്ന് കേസ് പരിഗണിക്കുന്നത് എറണാകുളം സി.ബി.ഐ കോടതിയാണ്.
സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍, സി.പി.എം പയ്യന്നൂര്‍ ഏരിയാ സെക്രട്ടറി ടി.ഐ മധുസൂദനന്‍ ഉള്‍പ്പെടെ കേസില്‍ 25 പ്രതികളാണുള്ളത്. ഇതില്‍ 19 പ്രതികള്‍ക്കെതിരേ കേസ് നേരത്തെ പരിഗണിച്ച തലശ്ശേരി ജില്ലാ പ്രിന്‍സിപ്പല്‍ സെഷന്‍സ് കോടതി മുന്‍പാകെയാണ് ആദ്യ കുറ്റപത്രം നല്‍കിയിരുന്നത്.
പിന്നീട് ഗൂഢാലോചന സംബന്ധിച്ച രണ്ടാമത്തെ കുറ്റപത്രം സി.ബി.ഐ കോടതിയിലാണ് സമര്‍പ്പിച്ചത്. ആറ് പേരെയാണ് ഇതില്‍ സി.ബി.ഐ പ്രതിപ്പട്ടികയില്‍ ഉള്‍പ്പെടുത്തിയിരുന്നത്. മനോജ് വധക്കേസിന്റെ വിചാരണ സി.ബി.ഐ കേസ് പരിഗണിക്കുന്നഎറണാകുളം ഫസ്റ്റ് ക്ലാസ് മജിസ്‌ട്രേറ്റ് കോടതിയിലേക്ക് മാറ്റാന്‍ സുപ്രിം കോടതി 2017 മാര്‍ച്ച് ഏഴിന് ഉത്തരവിട്ടിരുന്നു.
അതിനിടെ മനോജ് കേസിന്റെ വിചാരണ നടപടികള്‍ സംസ്ഥാനത്തിന് പുറത്ത് പരിഗണിക്കണമെന്ന സി.ബി.ഐയുടെ ഹരജി കോടതിയുടെ പരിഗണനയിലാണ്. പി.ജയരാജനുള്‍പ്പെടെയുള്ള പ്രതികള്‍ക്ക് ഉന്നത രാഷ്ട്രീയ ബന്ധമുള്ളതിനാലും സാക്ഷികളെ സാധീനിക്കാന്‍ ഇടയുള്ളതിനാലും വിചാരണ സംസ്ഥാനത്തിന് വെളിയിലാക്കണമെന്നാണ് സി.ബി.ഐ ആവശ്യപ്പെട്ടിരിക്കുന്നത്. ഈ ഹരജിയെ പ്രതിഭാഗം ശക്തമായി എതിര്‍ക്കാനുള്ള നീക്കത്തിലാണ്.