ന്യൂഡല്‍ഹി: പ്രിയങ്കാ ഗാന്ധി സജീവ രാഷ്ട്രീയ പ്രവര്‍ത്തനത്തിനിറങ്ങുന്നെന്ന വാര്‍ത്തയ്ക്കു പിന്നാലെ പ്രിയങ്കയ്‌ക്കെതിരെ വിവാദ പരാമര്‍ശവുമായി ബി.ജെ.പി എം.പി വിനയ് കത്യാര്‍. പ്രിയങ്കയേക്കാള്‍ സുന്ദരികള്‍ ബി.ജെ.പിയിലുണ്ടെന്നാണ് ഉത്തര്‍പ്രദേശില്‍ നിന്നുള്ള എം.പിയായ വിനയ് കത്യാര്‍ പറഞ്ഞത്. കത്യാറിന്റെ പരാമര്‍ശം ഏറെ വിവാദമായിരുന്നു. ഉത്തര്‍പ്രദേശ് തെരഞ്ഞെടുപ്പില്‍ പ്രിയങ്കയുടെ സാന്നിധ്യം തിരിച്ചടിയാവുമോയെന്ന ചോദ്യത്തിലായിരുന്നു കതിയാറിന്റെ പ്രതികരണം.

അതിനിടെ കത്യാറിന് മറുപടിയുമായി പ്രിയങ്ക തന്നെ രംഗത്തുവന്നു. ബിജെപി നേതാവിന്റെ പ്രതികരണം ഇന്ത്യയിലെ പാതിവരുന്ന ജനസംഖ്യയോടുള്ള ബിജെപിയുടെ മാനസികാവസ്ഥയാണ് വെളിവാക്കുന്നതെന്ന് പ്രിയങ്ക തിരിച്ചടിച്ചു.

കത്യാറിന്റെ സ്ത്രീ വിരുദ്ധ പരാമര്‍ശത്തില്‍ പ്രധാനമന്ത്രി നരേന്ദ്രമോദിയും, ബിജെപി പ്രസിഡന്റ് അമിത് ഷായും മാപ്പുപറയണമെന്നും കോണ്‍ഗ്രസ് വക്താവ് രണ്‍ദീപ് സുര്‍ജേവാല ആവശ്യപ്പെട്ടു.