കോഴിക്കോട്: നിയന്ത്രണംവിട്ട ബസ് അപകടത്തില്‍പെട്ട് വിനോദയാത്രാ സംഘത്തിലെ വിദ്യാര്‍ഥികള്‍ ഉള്‍പ്പെടെ നാല്‍പ്പതിലധികം പേര്‍ക്ക് പരുക്കേറ്റു. കണ്ണൂരില്‍ നിന്നുള്ള വിദ്യാര്‍ഥികളുമായെത്തിയ ബസ് റോഡരികിലെ വീട്ടിലേക്ക് ഇടിച്ചു കയറുകയായിരുന്നു. വിദ്യാര്‍ഥികള്‍ക്ക് പുറമെ ബസിലുണ്ടായിരുന്ന അഞ്ച് അധ്യാപകരും ബസ് ഡ്രൈവറും പരുക്കേറ്റവരില്‍ ഉള്‍പ്പെടും. ഇന്നലെ വൈകിട്ട് 3.20ഓടെ പുതിയാപ്പയിലാണ് അപകടം. പരുക്കേറ്റവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. തെറ്റായ ദിശയില്‍ വന്ന ബൈക്ക് യാത്രക്കാരനെ രക്ഷിക്കാന്‍ ശ്രമിക്കുന്നതിനിടെ ബസ് സമീപത്തെ വീട്ടിലേക്ക് ഇടിച്ചു കയറുകയായിരുന്നുവെന്നു ദൃക്‌സാക്ഷികള്‍ പറഞ്ഞു.
കണ്ണൂര്‍ പയ്യന്നൂര്‍ കണ്ടങ്കാളി ഷേണായ് സ്മാരക ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികള്‍ സഞ്ചരിച്ച ബസാണ് അപകടത്തില്‍പെട്ടത്. രണ്ടു ബസുകളിലായിരുന്നു സംഘം സഞ്ചരിച്ചിരുന്നത്. സ്‌കൂളിലെ അഞ്ചാംക്ലാസിലെയും എട്ടാംക്ലാസിലെയും കുട്ടികള്‍ സഞ്ചരിച്ച ഗ്രീന്‍ബേര്‍ഡ് ബസാണ് അപകടത്തില്‍പെട്ടത്. കോഴിക്കോട്ട് വിനോദയാത്രക്കെത്തിയ സംഘം പ്ലാനറ്റോറിയവും ബീച്ചും സന്ദര്‍ശിച്ചു മടങ്ങവേയായിരുന്നു അപകടം. സംഭവം നടന്നയുടന്‍ നാട്ടുകാരുടെ നേതൃത്വത്തില്‍ രക്ഷാപ്രവര്‍ത്തനം നടത്തി.