തിരുവനന്തപുരം: വിവിധ പദ്ധതികളിലായി ജലവിഭവ വകുപ്പിനു കീഴിലുള്ള 1,199 അധിക തസ്തികകള്‍ റദ്ദാക്കാന്‍ മന്ത്രിസഭായോഗം തീരുമാനിച്ചു. അധികമെന്നു കണ്ടെത്തിയതും 2003ല്‍ തദ്ദേശസ്വയംഭരണ വകുപ്പിലേക്ക് പുനര്‍വിന്യസിച്ചതും വിരമിച്ച ഒഴിവുകളിലേക്കടക്കം നേരത്തെ സൂപ്പര്‍ ന്യൂമററി ആയി സൃഷ്ടിച്ചതുമായ തസ്തികകളാണ് റദ്ദാക്കുന്നത്.
ജലവിഭവ വകുപ്പിലെ സാങ്കേതിക വിഭാഗം ജീവനക്കാരുടെ 371ഉം മിനിസ്റ്റീയല്‍ ജീവനക്കാരുടെ 278ഉം പുതുതായി കണ്ടെത്തിയ 186ഉം മറ്റ് വകുപ്പുകളിലേക്ക് 2012ല്‍ പുനര്‍വിന്യസിച്ച 364ഉം തസ്തികകളാണ് റദ്ദാക്കുന്നത്.
അസിസ്റ്റന്റ് എക്‌സിക്യൂട്ടീവ് എന്‍ജിനീ യര്‍, അസിസ്റ്റന്റ് എന്‍ജിനീയര്‍, ഡ്രാഫ്റ്റ്‌സ്മാന്‍, യു.ഡി.സി, ടൈപ്പിസ്റ്റ്, ഓഫിസ് അസിസ്റ്റന്റ്, ഓഫിസ് അറ്റന്‍ഡന്റ്, ഡ്രൈവര്‍, പാര്‍ട്ട് ടൈം സ്വീപ്പര്‍ തുടങ്ങിയ തസ്തികകളാണിത്. ഈ തസ്തികകള്‍ റദ്ദാക്കിയാലും ഒരാളുടെ പോലും ജോലി നഷ്ടപ്പെടില്ലെന്ന് ജലവിഭവ മന്ത്രി മാത്യു ടി.തോമസ് മന്ത്രിസഭായോഗത്തില്‍ അറിയിച്ചു.
ജീവനക്കാരെ 2003ല്‍ തദ്ദേശസ്വയംഭരണ വകുപ്പിലേക്ക് പുനര്‍വിന്യസിച്ചെങ്കിലും തസ്തികകള്‍ ജലവിഭവ വകുപ്പില്‍ തന്നെ തുടരുകയായിരുന്നു.