ആലുവ: സമസ്ത കേരള ജംഇയ്യത്തുല്‍ മുഅല്ലിമീന്‍ സംഘടിപ്പിക്കുന്ന ഏഷ്യയിലെ ഏറ്റവും വലിയ കലാസാഹിത്യമേളയുടെ ഭാഗമായുള്ള ആലുവാ റെയ്ഞ്ച്തല സാഹിത്യകലാമേള നാളെ ആലുവാ തോട്ടുമുഖം ക്രസന്റ് പബ്ലിക് സ്‌കൂളില്‍ കോട്ടുമല ബാപ്പുമുസ്‌ലിയാര്‍ നഗറില്‍ നടക്കും.
റെയ്ഞ്ച് പരിധിയിലെ ഇരുപത് മദ്‌റസകളില്‍ നിന്നായി മുന്നൂറോളം കലാപ്രതിഭകള്‍ മാറ്റുരക്കും. വൈകുന്നേരം ഏഴിന് ചേരുന്ന സമാപന സമ്മേളനം മുന്‍പൊതുമരാമത്ത് വകുപ്പ് മന്ത്രി ഇബ്രാഹിംകുഞ്ഞ് എം.എല്‍.എ ഉദ്ഘാടനം ചെയ്യും. സ്വാഗതസംഘം ചെയര്‍മാന്‍ അബ്ദുള്‍കരീം ഫൈസി അധ്യക്ഷത വഹിക്കും. അന്‍വര്‍ സാദത്ത് എം.എല്‍.എ മുഖ്യാതിഥിയാകും. ക്രസന്റ് പബ്ലിക് സ്‌കൂള്‍ സെക്രട്ടറി അബ്ദുന്നാസിര്‍ സമ്മാനദാനം നിര്‍വഹിക്കും.
അഞ്ച്, ഏഴ് ക്ലാസുകളില്‍ കഴിഞ്ഞ വര്‍ഷം നടന്ന വാര്‍ഷിക പൊതുപരീക്ഷകളില്‍ റെയ്ഞ്ച് തല റാങ്ക് ജേതാക്കള്‍ക്ക് സമസ്ത കേന്ദ്ര മുശാവറ അംഗം ഇ.എസ് ഹസന്‍ ഫൈസി അവാര്‍ഡുകള്‍ സമ്മാനിക്കും.
ബോര്‍ഡ് മുഫത്തിശ് സ്വദറുദ്ദീന്‍ ബാഖവി കൊല്ലം അനുമോദന പ്രഭാഷണം നടത്തുമെന്ന് സ്വാഗത സംഘം ചെയര്‍മാന്‍ അബ്ദുല്‍കരീം ഫൈസി ,ജനറല്‍ കണ്‍വീനര്‍ ബി.എ. എം. അജ്മല്‍ ബാഖവി, റെയ്ഞ്ച് സെക്രട്ടറി അഷ്‌റഫ് ഹുദവി എന്നിവര്‍ അറിയിച്ചു.