തിരുവനന്തപുരം: സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിലെ കോണ്‍ഗ്രസ് അംഗങ്ങള്‍ക്ക് പെരുമാറ്റച്ചട്ടം ഏര്‍പെടുത്തി. ഇന്നലെ ചേര്‍ന്ന കെ.പി.സി.സി വിശാല എക്‌സിക്യൂട്ടീവ് യോഗത്തിലാണ് തീരുമാനം. ഇടതു കക്ഷികളുമായോ ബി.ജെ.പിയുമായോ ഒരു തരത്തിലും ധാരണയുണ്ടാക്കാന്‍ പാടില്ലെന്ന് യോഗം ആവശ്യപ്പെട്ടു.
കേരള കോണ്‍ഗ്രസു(എം)മായി നിലവിലുള്ള ധാരണ തുടരണം. തദ്ദേശഭരണ സ്ഥാപനങ്ങളിലെ കോണ്‍ഗ്രസ് പാര്‍ലമെന്ററി പാര്‍ട്ടി നേതാക്കള്‍ യഥാക്രമം ഡി.സി.സി, ബ്ലോക്ക്, മണ്ഡലം കമ്മിറ്റി യോഗങ്ങളില്‍ പങ്കെടുക്കുകയും അവരുടെ പ്രവര്‍ത്തനം വിശദീകരിക്കുകയും വേണം.
കോണ്‍ഗ്രസ് മെമ്പര്‍മാരില്ലാത്ത വാര്‍ഡുകളില്‍ നിന്ന് വരുന്ന പ്രവര്‍ത്തകരുടെയും ജനങ്ങളുടെയും കാര്യങ്ങള്‍ കൂടി ശ്രദ്ധിക്കണം തുടങ്ങി നിരവധി നിബന്ധനകളും പെരുമാറ്റച്ചട്ടത്തിലുണ്ട്.
നിബന്ധനകള്‍ ലംഘിക്കുന്നവര്‍ക്കെതിരേ ബന്ധപ്പെട്ട കമ്മിറ്റികള്‍ ഡി.സി.സികളുടെ അനുവാദത്തോടെ അച്ചടക്ക നടപടി സ്വീകരിക്കണമെന്ന നിര്‍ദേശവുമുണ്ട്.