മലപ്പുറം: മലപ്പുറം നഗരസഭയുടെ മാതൃകാ പദ്ധതിയായ 'ഫുഡ് ഓണ്‍ വാള്‍' നിര്‍ത്തലാക്കുന്നു. പകരം ഹോട്ടല്‍ വ്യാപാരികളുടെ ആഭിമുഖ്യത്തില്‍ ഓപറേഷന്‍ മക്കാനി; വിശപ്പുരഹിത മലപ്പുറം പദ്ധതി നടപ്പാക്കും. കഴിഞ്ഞ ഭരണസമിതിയുടെ കാലത്താണ് മലപ്പുറം നഗരസഭയും ഹോട്ടല്‍ ആന്‍ഡ് റെസ്റ്റോറന്റ് അസോസിയേഷനും സംയുക്തമായി ഭക്ഷണം ചുമരിലുണ്ട് എന്ന പേരില്‍ സൗജന്യഭക്ഷണ വിതരണ പദ്ധതി ആരംഭിച്ചിരുന്നത്.
ആളുകളില്‍നിന്നു സംഭാവന സ്വീകരിച്ച് നഗരത്തിലെ മിക്ക ഹോട്ടലുകള്‍ക്ക് മുന്നിലും ചുമരുകളില്‍ സ്ഥാപിച്ച പെട്ടികളില്‍നിന്ന് ആവശ്യക്കാര്‍ക്ക് സൗജന്യ ടോക്കണുകള്‍ എടുക്കാവുന്ന തരത്തിലായിരുന്നു പദ്ധതി നടപ്പിലാക്കിയിരുന്നത്. ആവശ്യക്കാര്‍ക്ക് ടോക്കണ്‍ എടുത്ത് ഭക്ഷണം കഴിച്ചു മടങ്ങാം. ആദ്യഘട്ടത്തില്‍ പദ്ധതി ഏറെക്കുറേ വിജയമായിരുന്നെങ്കിലും പിന്നീട് ടോക്കണ്‍ എടുക്കാനും ഭക്ഷണം കഴിക്കാനും ആളുകള്‍ വരാതായി.
തുടര്‍ന്നാണ് ആവശ്യക്കാരില്ലാത്തതിനാല്‍ പദ്ധതി നിര്‍ത്തലാക്കുന്നതെന്ന് ഹോട്ടല്‍ ആന്‍ഡ് റെസ്‌റ്റോറന്റ് അസോസിയേഷന്‍ ഭാരവാഹികള്‍ വാര്‍ത്താമ്മേളനത്തില്‍ പറഞ്ഞു. ഫുഡ് ഓണ്‍ വാള്‍ പദ്ധതിക്കു പകരം ഓപറേഷന്‍ മക്കാനി; വിശപ്പു രഹിത മലപ്പുറം പദ്ധതിയാണ് പുതുതായി തുടങ്ങുന്നത്. സൗജന്യ ഭക്ഷണ കൂപ്പണുകള്‍ നഗരസഭ ഓഫിസില്‍നിന്നു ലഭ്യമാക്കും. ആവശ്യക്കാര്‍ക്കു കൂപ്പണ്‍വഴി തെരഞ്ഞെടുക്കപ്പെട്ട ഹോട്ടലുകളില്‍നിന്നു ഭക്ഷണം കഴിക്കാം. ആദ്യഘട്ടത്തില്‍ ഉച്ചഭക്ഷണം മാത്രമാണ് വിതരണം ചെയ്യുക.