കക്കാട്: നമ്മുടെ മഹത്തായ സംസ്‌കാരത്തെയും പൈതൃകത്തെയും കൊല ചെയ്യുന്നതാകരുത് കലകളെന്ന് എസ്.വൈ.എസ് സംസ്ഥാന സെക്രട്ടറി അഹ്മദ് തേര്‍ളായി പറഞ്ഞു. കക്കാട് റെയ്ഞ്ച് ഇസ്‌ലാമിക കലാമേള അത്തായക്കുന്ന് ഇസ്സത്തുല്‍ ഇസ്‌ലാം മദ്‌റസയില്‍ ഉദ്ഘാടനം ചെയ്യുകയായിരുന്നു അദ്ദേഹം.
മനുഷ്യന്റെ പൈശാചിക വികാരങ്ങളെയും ആക്രമണ വാസനകളെയും ഉത്തേജിപ്പിക്കുന്ന അശ്ലീല കലകളും സാഹിത്യങ്ങളും സമൂഹം വര്‍ജിക്കണം. സാമൂഹ്യ പുരോഗതിക്കും വ്യക്തിയുടെ നല്ലരീതിയിലുള്ള സ്വഭാവ രൂപീകരണത്തിലും കലകള്‍ക്ക് സ്വാധീനം ചെലുത്താനാകണമെന്നും അദ്ദേഹം പറഞ്ഞു. റെയ്ഞ്ച് പ്രസിഡന്റ് ഇബ്രാഹം മടക്കിമല അധ്യക്ഷനായി. കൗണ്‍സിലര്‍ കെ.പി.എ സലിം, ജംഷീര്‍ ദാരിമി, ബി അബ്ദുല്‍ കരിം, കെ ഖാലിദ് ഹാജി, പി.പി അഷ്‌റഫ്, അബ്ദുല്‍ സലാം കൊടപ്പാല, നജീബ് കടവത്ത്, സി.ബി ഖാലിദ് ഹാജി, പി.സി അബൂഞ്ഞി ഹാജി, ഇസ്മായില്‍ ഹാജി, ബി അബ്ദുല്ല സംസാരിച്ചു.