ന്യൂഡല്‍ഹി: ധനമന്ത്രി അരുണ്‍ ജെയ്റ്റ്‌ലിയെ അപകീര്‍ത്തിപ്പെടുത്തുന്ന രീതിയില്‍ പരാമര്‍ശം നടത്തിയെന്ന കേസില്‍ ഡല്‍ഹി മുഖ്യമന്ത്രി അരവിന്ദ് കെജ്്‌രിവാള്‍ വിചാരണക്കോടതിയില്‍ നേരിട്ട് ഹാജരാകണമെന്ന് ഡല്‍ഹി മെട്രോപൊളിറ്റന്‍ മജിസ്‌ട്രേറ്റ് കോടതി ഉത്തരവിട്ടു.
ഗോവയില്‍ തെരഞ്ഞെടുപ്പു റാലിയില്‍ വിവാദ പരാമര്‍ശം നടത്തിയ സംഭവത്തിന് പിന്നാലെയാണ് അപകീര്‍ത്തി കേസിലും കെജരിവാളിനെതിരേ ഡല്‍ഹി കോടതിയുടെ ഉത്തരവ് ഉണ്ടായിരിക്കുന്നത്.
കേസ് പരിഗണിക്കുന്ന മാര്‍ച്ച് 25ന് കെജ്്‌രിവാള്‍ കോടതിയില്‍ ഹാജരാകണമെന്നാണ് മജിസ്‌ട്രേറ്റ് ഉത്തരവിട്ടത്. കെജ്്‌രിവാളിനെക്കൂടാതെ ആംആദ്മി പാര്‍ട്ടി നേതാക്കളായ കുമാര്‍ വിശ്വാസ്, അഷുതോഷ്, സഞ്ജയ് സിങ്, രാഘവ് ഛദ്ദ, ദീവക് വാജ്‌പെയ് എന്നിവര്‍ക്കെതിരേയും അപകീര്‍ത്തി കേസ് ഫയല്‍ ചെയ്തിട്ടുണ്ട്. ഇവരും 25ന് കോടതിയില്‍ ഹാജരാകണം.
ഡല്‍ഹി ഡിസ്ട്രിക്ട് ക്രിക്കറ്റ് അസോസിയേഷനുമായി ബന്ധപ്പെട്ടാണ് ജയ്റ്റിലിക്കെതിരേ അഴിമതിയാരോപണവുമായി കെജ്‌രിവാളും പാര്‍ട്ടി നേതാക്കളും രംഗത്തെത്തിയത്. കെജ്്‌രിവാള്‍ സിവില്‍ സര്‍വീസില്‍ ജോലി ചെയ്യവെ നടത്തിയ അഴിമതി സംബന്ധിച്ച് സി.ബി.ഐ അന്വേഷണം നടത്തുന്നതില്‍ നിന്നും ജനശ്രദ്ധ മാറ്റുന്നതിനാണ് തനിക്കെതിരായി ആരോപണമുന്നയിച്ചതെന്നാണ് ജയ്റ്റ്‌ലി കോടതിയില്‍ ബോധിപ്പിച്ചത്.