കല്‍പ്പറ്റ: ഒന്നാം ഘട്ട പള്‍സ് പോളിയോ തുള്ളിമരുന്ന് വിതരണത്തില്‍ മരുന്ന് നല്‍കാന്‍ വിട്ടുപോയ കുട്ടികള്‍ക്ക് ജില്ലയിലെ പരിശീലനം ലഭിച്ച 2560 വളണ്ടിയര്‍മാര്‍ ഇന്നും നാളെയുമായി വീടുകളിലെത്തി തുള്ളിമരുന്ന് നല്‍കുമെന്ന് ജില്ലാ മെഡിക്കല്‍ ഓഫിസര്‍ അറിയിച്ചു. ജില്ലയിലെ 886 ബൂത്തുകള്‍വഴി 50,962 കുട്ടികള്‍ക്കാണ് ആദ്യദിനം തുള്ളിമരുന്ന് നല്‍കിയത്. വളണ്ടിയര്‍മാര്‍ വീടുകളിലെത്തുന്നതിനു പുറമേ ജില്ലയിലെ ബസ് സ്റ്റാന്‍ഡ് ബൂത്തുകളും പ്രവര്‍ത്തിക്കും. കല്‍പ്പറ്റ പഴയ ബസ് സ്റ്റാന്‍ഡ്, പുതിയ ബസ് സ്റ്റാന്‍ഡ്, സുല്‍ത്താന്‍ ബത്തേരി പ്രൈവറ്റ് ബസ് സ്റ്റാന്‍ഡ്, പനമരം- മാനന്തവാടി- കാട്ടിക്കുളം- പുല്‍പ്പള്ളി- മേപ്പാടി ബസ് സ്റ്റാന്‍ഡുകളിലാണ് ബൂത്തുകള്‍ പ്രവര്‍ത്തിക്കുക. നിര്‍മാര്‍ജനം ചെയ്യപ്പെട്ട പോളിയോ രോഗം തിരിച്ചു വരാതിരിക്കാന്‍ എല്ലാ വിഭാഗം ജനങ്ങളും ജാഗ്രത പുലര്‍ത്തണമെന്ന് ഡി.എം.ഒ അഭ്യര്‍ഥിച്ചു.