ന്യൂഡല്‍ഹി: ജെ.എന്‍.യു വിദ്യാര്‍ഥികളായ ഉമര്‍ഖാലിദിനും അനിര്‍ബന്‍ ഭട്ടാചാര്യയ്ക്കും എതിരായി സര്‍വകലാശാല അധികൃതര്‍ സ്വീകരിച്ച അച്ചടക്ക നടപടി ഹൈക്കോടതി താല്‍ക്കാലികമായി തടഞ്ഞു. നടപടിയ്‌ക്കെതിരേ യൂനിവേഴ്‌സിറ്റി അപ്‌ലറ്റ് അതോറിറ്റിയില്‍ ഇരുവരും സമര്‍പ്പിച്ച അപ്പീല്‍ തീര്‍പ്പാകുന്നത് വരെ ഇരുവര്‍ക്കുമെതിരേ നടപടി ജസ്റ്റിസ് മന്‍മോഹന്‍ സ്റ്റേ ചെയ്തു. നേരത്തെ വിദ്യാര്‍ഥി യൂനിയന്‍ നേതാവ് കനയ്യ കുമാറിനെതിരായ നടപടിയും കോടതി തടഞ്ഞിരുന്നു. ഇതുമായി ബന്ധപ്പെട്ട് മെയ് 13ന് പുറപ്പെടുവിച്ച വിധി ഇവര്‍ക്കും ബാധകമാണെന്നു കോടതി വ്യക്തമാക്കുകയായിരുന്നു. ഫെബ്രുവരി ഒന്‍പതിന് അഫ്‌സല്‍ ഗുരു അനുസ്മരണം സംഘടിപ്പിച്ചതിന് ഉമര്‍ഖാലിദിന് ഒരു സെമസ്റ്റര്‍ റദ്ദാക്കലും 20,000 രൂപ പിഴയുമാണ് സര്‍വകലാശാല അധികൃതര്‍ വിധിച്ചിരുന്നത്. അനിര്‍ബന് ജൂലൈ 15 വരെ മാറ്റിനിര്‍ത്തലും ജൂലൈ 23ന് ശേഷം അഞ്ചു വര്‍ഷത്തേക്ക് വിലക്കുമായിരുന്നു ശിക്ഷ. തന്റെ ഗവേഷണ പ്രബന്ധം പൂര്‍ത്തിയാക്കാനാണ് ജൂലൈ 16 മുതല്‍ 22 വരെ അനിര്‍ബന് സമയം നല്‍കിയത്.
അപ്്‌ലറ്റ് അതോറിറ്റി വിദ്യാര്‍ഥികളുടെ അപ്പീല്‍ തള്ളുകയാണെങ്കില്‍ ആ ഉത്തരവ് മൂന്നാഴ്ചയ്ക്ക് ശേഷം മാത്രമേ ബാധകമാക്കാന്‍ പാടുള്ളു എന്ന് കോടതി നിര്‍ദ്ദേശിച്ചു. ഉപാധികളോടെയാണ് ഉത്തരവ് പുറപ്പെടുവിക്കുന്നതെന്നും ഇതുമായി ബന്ധപ്പെട്ട് പ്രതിഷേധത്തിലോ ധര്‍ണയിലോ പങ്കാളികളാകരുതെന്നും കോടതി വിദ്യാര്‍ഥികള്‍ക്കു നിര്‍ദേശം നല്‍കി.