പാറ്റ്‌ന: ബിഹാറില്‍ നിന്നുള്ള ബബിത ദേവി കാണാതായ തന്റെ തത്തയെ കണ്ടെത്തുന്നവര്‍ക്ക് നല്ലൊരു ഓഫര്‍ നല്‍കിയിരിക്കുകയാണ്. ചെറിയ തുകയൊന്നുമല്ല, കാല്‍ ലക്ഷം രൂപ നല്‍കുമെന്നാണ് വാഗ്ദാനം.

നവാഡ ജില്ലയിലെ വാര്‍സലിഗഞ്ച് ചൗക്കിലെ വീട്ടില്‍ നിന്നാണ് ജനുവരി ആദ്യത്തില്‍ തത്തയെ കാണാതായത്. ഇതോടെ സങ്കടത്തിലായ ബബിത തത്തയെ കാണ്മാനില്ലെന്നു കാട്ടി പൊലിസില്‍ പരാതി നല്‍കി. ഇതുകൊണ്ട് നിര്‍ത്തിയില്ല, പറ്റുന്നിടത്തെല്ലാം തത്തയെ കാണ്മാനില്ലെന്ന പോസ്റ്റര്‍ ഒട്ടിക്കുകയും ചെയ്തു.

കഴിഞ്ഞ എട്ടു വര്‍ഷമായി ഇവര്‍ ഈ തത്തയെ വളര്‍ത്തുകയാണ്. തത്തയെ കാണാതായതു മുതല്‍ അവര്‍ അതീവ ദു:ഖിതയാണെന്നും തിന്നാനും ഉറങ്ങാനുമാവുന്നില്ലെന്നും ബബിതയുടെ ബന്ധു പറഞ്ഞു.