ലഖ്‌നോ:കുടുംബ പോര് രൂക്ഷമായി തുടരുന്ന സമാജ് വാദി പാര്‍ട്ടിയില്‍ പുതിയ വഴിത്തിരിവ്. അഖിലേഷുമായി തെറ്റി പിളര്‍പ്പിന്റെ വക്കോളമെത്തി നിന്ന എസ്.പിയില്‍ മുന്‍ സംസ്ഥാന പ്രസിഡന്റും മുലായത്തിന്റെ സഹോദരനുമായ ശിവ്പാല്‍ യാദവ് പുതിയ പാര്‍ട്ടിയുണ്ടാക്കാന്‍ തീരുമാനിച്ചു.
മുലായം സിങ് യാദവിന്റെ അനുഗ്രഹാശിസ്സുകളോടെയാണ് ഇതെന്നാണ് വിവരമെങ്കിലും ഇതുവരെയുള്ളതില്‍ നിന്നും വ്യത്യസ്തമായി എസ്.പി പൂര്‍ണ പിളര്‍പ്പിനെയാണ് താമസിയാതെ നേരിടാന്‍ പോകുന്നത്. തെരഞ്ഞെടുപ്പിന് ശേഷം ഫലം പുറത്ത് വരുന്ന മാര്‍ച്ച് 11ന് പുതിയ പാര്‍ട്ടി രൂപീകരിക്കുമെന്നാണ് ശിവ്പാല്‍ യാദവ് അറിയിച്ചത്. ഉത്തര്‍പ്രദേശിലെ എത്്‌വായില്‍ പാര്‍ട്ടി അനുഭാവികളുമായുള്ള ചര്‍ച്ചയിലാണ് അദ്ദേഹം പുതിയ പാര്‍ട്ടി രൂപീകരണം സംബന്ധിച്ച് വെളിപ്പെടുത്തിയത്. നിങ്ങള്‍ പുതിയ സര്‍ക്കാരുണ്ടാക്കുമ്പോള്‍ ഞങ്ങള്‍ പുതിയ പാര്‍ട്ടിയാണ് ഉണ്ടാക്കുകയെന്നും അദ്ദേഹം അഖിലേഷ് വിഭാഗത്തെ ഓര്‍മിപ്പിച്ചു.
പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തരുതെന്ന് മുഖ്യമന്ത്രി അഖിലേഷ് യാദവ് തെരഞ്ഞെടുപ്പ് പ്രചാരണത്തില്‍ നിര്‍ദേശം നല്‍കി പിരിഞ്ഞ ഉടനെയാണ് എത്്‌വായില്‍ ശിവ്പാല്‍ യാദവിന്റെ പ്രഖ്യാപനം.