സ്വന്തം ലേഖകന്‍
തിരുവനന്തപുരം: ജിഷയുടെ കൊലപാതകം അന്വേഷിക്കാന്‍ പുതിയ സംഘമായി. പിണറായി വിജയന്റെ ആദ്യ മന്ത്രിസഭായോഗത്തില്‍ എ.ഡി.ജി.പി:ബി സന്ധ്യയെ അന്വേഷണ ചുമതല ഏല്‍പ്പിക്കുകയും അവരെ കഴിഞ്ഞ ദിവസം ദക്ഷിണാമേഖലാ എ.ഡി.ജി.പിയായി നിയമിക്കുകയും ചെയ്തിരുന്നു.
പഴയ അന്വേഷണ സംഘത്തെ പൂര്‍ണമായും ഒഴിവാക്കി സന്ധ്യയ്ക്ക് ആവശ്യമുള്ള ടീമിനെ തെരഞ്ഞെടുക്കാന്‍ മുഖ്യമന്ത്രി അനുമതി നല്‍കിയിരുന്നു. ഇതിന്റെ അടിസ്ഥാനത്തില്‍ പുതിയ ടീമിനെ തെരഞ്ഞെടുക്കുകയും സര്‍ക്കാര്‍ അനുമതി നല്‍കുകയും ചെയ്തു. കൊല്ലം റൂറല്‍ എസ്.പി അജിതാ ബീഗം, ക്രൈംബ്രാഞ്ച് എസ്.പി പി.ഉണ്ണിരാജ, എറണാകുളം സി.ബി.സി.ഐ.ഡി എസ്.പി: വി.കെ.മധു, ഡിവൈ.എസ്.പിമാരായ സോജന്‍, സുദര്‍ശന്‍, ശശീധരന്‍, സി.ഐ ബൈജു പൗലോസ് എന്നിവരാണ് സന്ധ്യയുടെ കീഴിലെ പുതിയ അന്വേഷണ സംഘം. നിലവില്‍ കേസ് അന്വേഷിക്കുന്ന സംഘത്തിന്റെ തലവന്‍ ഡിവൈ.എസ്.പി ജിജിമോന്‍ കേസ് ഫയല്‍ പുതിയ അന്വേഷണ സംഘത്തിന് കൈമാറി.
പുതിയ അന്വേഷണ സംഘത്തില്‍ കഴിവ് തെളിയിച്ച രണ്ട് വനിതാ ഐ.പി.എസുകാരാണുള്ളത്. ബി സന്ധ്യയും, അജിതാബീഗവും. തിരുവനന്തപുരം ഡെപ്യൂട്ടി കമ്മിഷണറായും വയനാട് എസ്.പിയായും മികവു തെളിയിച്ച അജിതാബീഗത്തിനെ രാഷ്ട്രീയ ഇടപെടല്‍ മൂലം തട്ടിക്കളിക്കുകയായിരുന്നു.
അവസാനം തെരഞ്ഞെടുപ്പ് കമ്മിഷന്‍ ഇടപ്പെട്ടാണ് കൊല്ലം റൂറല്‍ എസ്.പിയായി നിയമിച്ചത്. അവിടെ നിന്നാണ് ജിഷാ കൊലക്കേസ് അന്വേഷണ സംഘത്തിലേയ്ക്ക് എത്തുന്നത്. ക്രൈംബ്രാഞ്ച് എസ്.പി പി.ഉണ്ണിരാജ നിലവില്‍ കലാഭവന്‍ മണിയുടെ മരണം അന്വേഷിക്കുന്ന ഉദ്യോഗസ്ഥനാണ്.
അതേ സമയം, ജിഷ കൊലക്കേസ് സംബന്ധിച്ച അന്വേഷണം ആദ്യം മുതല്‍ തുടങ്ങുമെന്ന് ഇന്നലെ ദക്ഷിണ മേഖലാ എ.ഡി.ജി.പിയായി ചുമതലയേറ്റ ശേഷം ബി സന്ധ്യ സുപ്രഭാതത്തോട് പറഞ്ഞു. ഇന്ന് പുതിയ അന്വേഷണസംഘം യോഗം ചേരും.
നിലവില്‍ കേസ് അന്വേഷിച്ച സംഘവുമായി കാര്യങ്ങള്‍ ചര്‍ച്ച ചെയ്യുമെന്നും സന്ധ്യ പറഞ്ഞു. ജിഷ കൊലക്കേസ് പ്രതികളെ പിടികൂടാന്‍ കഴിവിന്റെ പരമാവധി ശ്രമിക്കുമെന്നും അവര്‍ പറഞ്ഞു.