മാനന്തവാടി: വന്യമൃഗങ്ങളെ വേട്ടയാടാനുള്ള ശ്രമത്തിനിടെ വനം വകുപ്പ് സ്ഥാപിച്ച കാമറയില്‍ കുടുങ്ങിയതിനെ തുടര്‍ന്ന് ഒളിവില്‍ പോയ രണ്ട് പേര്‍ അറസ്റ്റില്‍. തവിഞ്ഞാല്‍ വരയാല്‍ എടമന കളരി മന്ദം കോളനി രാമകൃഷ്ണന്‍ എന്ന ഹരിദാസന്‍ (34), കാപ്പാട്ടുമല കുറ്റിവാള്‍ കോളനി കുഞ്ഞിരാമന്‍ (35) എന്നിവരെയാണ് പേര്യ റെയ്ഞ്ചര്‍ ടി.സി രാജനും സംഘവും ഇന്നലെ അറസ്റ്റ് ചെയ്തത്.
കടുവകളെയും മാവോവാദികളെയും നിരീക്ഷിക്കുന്നതിനായി വരയാല്‍ സി.ആര്‍.പിക്കുന്നില്‍ സ്ഥാപിച്ച കാമറയില്‍ തോക്കും, ടോര്‍ച്ചും ഉള്‍പ്പെടെയുള്ള സാധനങ്ങള്‍ അടക്കം ഇരുവരും പതിയുകയായിരുന്നു. 2016 സെപ്തംബര്‍ ഒന്‍പതിന് രാത്രിയായിരുന്നു സംഭവം. കാമറയില്‍ പതിഞ്ഞുവെന്നറിഞ്ഞതോടെ ഇരുവരും ഒളിവില്‍ കഴിയുകയായിരുന്നു. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു.