പനമരം: മുന്‍ അംഗത്തിന് സര്‍ക്കാര്‍ ജോലി ലഭിച്ചതോടെ ഒഴിവുവന്ന പനമരം ബ്ലോക്ക് പഞ്ചായത്ത് പാക്കം ഡിവിഷന്‍ ഉപതെരഞ്ഞെടുപ്പ് 21ന് നടക്കും.
മുന്‍ എം.എല്‍.എ രധാ രാഘവന്റെ മകന്‍ അര്‍ജ്ജുനനായിരുന്നു പാക്കം ഡിവിഷന്‍ മെമ്പര്‍. സര്‍ക്കാര്‍ ജോലി ലഭിച്ചതോടെ മെമ്പര്‍ സ്ഥാനം രാജിവക്കുകയായിരുന്നു.
പാക്കം ഡിവിഷനില്‍ ഏഴു വാര്‍ഡുകളിലായി 8870 വോട്ടര്‍മാരാണുള്ളത്. സ്ത്രീ വോട്ടര്‍മാരാണ് കൂടുതല്‍. ചെറുകാട്ടൂര്‍, നീര്‍ വാരം, അമ്മാനി, മരക്കാവ്, ആലൂര്‍കുന്ന്, പാക്കം, കുറുവ എന്നീ വാര്‍ഡുകളാണ് പാക്കം ഡിവിഷനിലുള്ളത്. ഉപതെരഞ്ഞെടുപ്പിലും മൂന്ന് മുന്നണികളും മത്സര രംഗത്തുണ്ട്.
മണി ഇയ്യമ്പമാണ് യു.ഡി.എഫ് സ്ഥാനാര്‍ഥി. എല്‍.ഡി.എഫിനായി ശങ്കരന്‍, ബി.ജെ.പിയുടെ തമ്പികണ്ണാമല തുടങ്ങിയവരാണ് മത്സര രംഗത്തുള്ളത്.
ഫെബ്രുവരി മൂന്നാണ് നാമനിര്‍ദേശ പത്രിക സമര്‍പ്പിക്കാനുള്ള അവസാന തിയതി. നാലിന് സൂക്ഷ്മ പരിശോധനയും ഫെബ്രുവരി ആറ് പത്രിക പിന്‍വലിക്കാനുള്ള അവസാന തിയതിയുമാണ്.
12 പോളിങ് സ്‌റ്റേഷനുകളാണ് തെരഞ്ഞെടുപ്പിനായി ഒരുക്കുന്നത്. ഫെബ്രുവരി 22നാണ് വോട്ടെണ്ണല്‍.