തിരൂരങ്ങാടി: താലൂക്കാശുപത്രിയില്‍ ഡോക്ടര്‍മാര്‍ നേരത്തേ മുങ്ങുന്നതായി പരാതി.  കഴിഞ്ഞ ദിവസം കക്കാട് സ്വദേശിയായ യുവതിക്ക് ഡോക്ടര്‍ മുങ്ങിയതുകാരണം കുഞ്ഞിനു ചികിത്സ നല്‍കാന്‍ ഏറെ പ്രയാസപ്പെടേണ്ടിവന്നു.
ഉച്ചക്ക് മുമ്പ് 12.30 ഓടെ യുവതി കുട്ടിയെ കാണിക്കുന്നതിനായി ടോക്കണെടുത്ത് ഒ.പിലെത്തിയപ്പോള്‍ സമയം കഴിഞ്ഞെന്നും ഡോക്ടര്‍ പോയെന്നുമുള്ള  മറുപടി ലഭിച്ചത്. പിന്നീട് ജനറല്‍ ഒ.പിയില്‍ ചെന്നെങ്കിലും അവിടെയും സമയം കഴിഞ്ഞെന്നും രണ്ടു മണിക്ക് ശേഷം ക്യാഷ്വാലിറ്റിയില്‍ കാണിക്കാമെന്നും പറഞ്ഞത്രേ. തുടര്‍ന്ന് ആശുപത്രി സൂപ്രണ്ടിനെ നേരില്‍ കണ്ട് പരാതിപ്പെട്ട യുവതി മേലാധികാരികള്‍ക്ക് രേഖാമൂലം പരാതി നല്‍കുമെന്നറിയിച്ചു.
ഇതോടെ  ഡോക്ടറെ വിളിച്ചുവരുത്തി കുട്ടിയെ പരിശോധിച്ചു. ഡ്യൂട്ടി സമയം തീരുന്നതിനു മുമ്പേ ഡോക്ടര്‍മാര്‍ സ്ഥലം വിടുന്നതായി നേരത്തെ പരാതി ഉണ്ടായിരുന്നു. ടോക്കെണെടുത്തു ഒരുമണിക്ക് മുമ്പേ വരുന്നരെ രണ്ടുമണിക്ക് ശേഷം ക്യാഷ്വാലിറ്റിയിലോ അടുത്ത ദിവസമോ കാണിക്കാമെന്ന മറുപടിയാണ് അധികൃതര്‍  നല്‍കുന്നത്.  ഇത് കാരണം ചികിത്സക്കെത്തുന്ന നിരവധി രോഗികള്‍ക്ക് ഏറെ പ്രയാസം നേരിടുന്നുണ്ട്. കാലത്ത് എട്ടു മുതല്‍ ഒരുമണി വരെയാണ് ഒ.പി. സമയം.