തരുവണ: ടൗണിലെ ബസ് കാത്തിരിപ്പ് കേന്ദ്രത്തിനടുത്ത് വൈദ്യുതി തൂണ്‍ കാട് മൂടിയിട്ടും വെട്ടി നന്നാക്കുന്നില്ലെന്ന് പരാതി. ഇലക്ട്രിക് പോസ്റ്റില്‍ മുള്‍ചെടികള്‍ പടര്‍ന്ന് പന്തലിച്ച് കിടക്കുകയാണ്. പോസ്റ്റില്‍ കയറാനോ അറ്റകുറ്റപ്പണികള്‍ നടത്താനോ സാധിക്കാത്ത വിധം കാട് മൂടിയിരിക്കുകയാണ്.
ഒരാഴ്ച മുന്‍പ് ഇലക്ട്രിക് പോസ്റ്റിലെ കാടുകള്‍ വെട്ടുന്നതിനും മറ്റുമായി രാവിലെ ഒന്‍പത് മുതല്‍ വൈകിട്ട് അഞ്ച് വരെ വൈദ്യുതി ഓഫാക്കിയിരുന്നെങ്കിലും പ്രവൃത്തി നടത്തിയിരുന്നില്ല. എന്നാല്‍ ഒരാഴ്ച കഴിഞ്ഞപ്പോള്‍ ടൗണിലെ രണ്ട് കടകളില്‍ വൈദ്യുതി ഇല്ലാതായപ്പോള്‍ നന്നാക്കുന്നതിനായി പോസ്റ്റില്‍ നോക്കിയപ്പോഴാണ് വൈദ്യുതി പോസ്റ്റ് കാണാത്ത വിധം മുള്‍ക്കാടുകള്‍ നിറഞ്ഞത് ശ്രദ്ധയില്‍പ്പെട്ടത്. അധികൃതരുടെ അനാസ്ഥ കാരണം വൈദ്യുതി ഇല്ലാത്തതിനാല്‍ ടൗണ്‍ മര്‍ച്ചന്റ് അസോസിയേഷന്‍ ഭാരവാഹികള്‍ പ്രതിഷേധിച്ചു. എത്രയും വേഗം വൈദ്യുതി പോസ്റ്റിലെ മുള്‍ക്കാടുകള്‍ വെട്ടിമാറ്റി ഉപയോഗ പ്രദമാക്കണമെന്നാണ് നാട്ടുകാരുടെ ആവശ്യം.