നിലമ്പൂര്‍: നിയമന കാര്യങ്ങളില്‍ ഉള്‍പ്പെടെ എയ്ഡഡ് സ്ഥാപനങ്ങളോടുള്ള സര്‍ക്കാര്‍ വിവേചനം അവസാനിപ്പിക്കണമെന്ന് പി.വി അബ്ദുല്‍ വഹാബ് എം.പി. കേരള എയ്ഡഡ് കോളജ് മിനിസ്റ്റീരിയല്‍ സ്റ്റാഫ് അസോസിയേഷന്‍ (കെ.എ.സി.എം.എസ്.എ) സംസ്ഥാന സമ്മേളനം നിലമ്പൂരില്‍ ഉദ്ഘാടനം ചെയ്യുകയായിരുന്നു അദ്ദേഹം. എയ്ഡഡ് മേഖലയെ തകര്‍ക്കാനുള്ള ശ്രമത്തിന്റെ ഭാഗമാണ് ഈ വിവേചനമെന്നും അദ്ദേഹം പറഞ്ഞു.
പി.കെ ബഷീര്‍ എം.എല്‍.എ അധ്യക്ഷനായി. കോഴിക്കോട് ഉത്തരമേഖല കോളജ് വിദ്യാഭ്യാസ ഡെപ്യൂട്ടി ഡയറക്ടര്‍ ഡോ.എല്‍സമ്മ ജോസഫ് അറക്കല്‍ മുഖ്യ പ്രഭാഷണം നടത്തി. ഉന്നത വിദ്യാദ്യാസ കൗണ്‍സില്‍ അംഗം എന്‍. സത്യാനന്ദന്‍, കെ.എ.സി.എം.എസ്.എ ജന.സെക്രട്ടറി കെ.സഫറുള്ള, ഇഖ്ബാല്‍ കോഴിപ്ര, കെ.ടി കുഞ്ഞാന്‍ സംസാരിച്ചു. തുടര്‍ന്ന് നടന്ന യാത്രയയപ്പ് സമ്മേളനം മുസ്‌ലിംലീഗ് ജില്ലാ ജന.സെക്രട്ടറി അഡ്വ.യു എ ലത്തീഫ് ഉദ്ഘാടനം ചെയ്തു. പി.ഷൗക്കത്തലി അധ്യക്ഷനായി. പ്രിന്‍സിപ്പല്‍ കൗണ്‍സില്‍ സംസ്ഥാന പ്രസിഡന്റും അമല്‍ കോളജ് പ്രിന്‍സിപ്പലുമായ ഡോ.എം.ഉസ്മാന്‍ മുഖ്യപ്രഭാഷണം നടത്തി. ടി.പി അഹമ്മദ് സലീം, കണ്ണിയന്‍ മുഹമ്മദലി, സി.റഫീക്ക്, സുബൈര്‍ കണിയാമ്പറ്റ, ബഷീര്‍ ഹുസൈന്‍ തങ്ങള്‍, പി.വി അബ്ദുല്‍ ലത്തീഫ്, ഡോ.പോള്‍ ആലപ്പാട്ട്, ആദം താനേരി, പി.ഇ അസ്ഗറലി സംസാരിച്ചു.
കേരള അഡ്മിനിട്രേറ്റീവ് സര്‍വിസില്‍ എയ്ഡഡ് മേഖലയെ പരിഗണിക്കണമെന്നും മത്സര പരീക്ഷകള്‍ എഴുതാന്‍ യോഗ്യരായ എയ്ഡഡ് കോളജ് ജീവനക്കാര്‍ക്കും അവസരം നല്‍കുന്നതിന് സ്‌പെഷ്യല്‍ റൂളില്‍ ഉള്‍പ്പെടുത്തണമെന്നും സമ്മേളനം ആവശ്യപ്പെട്ടു.