ബംഗളൂരു: ഇന്ത്യന്‍ സൂപ്പര്‍ ലീഗ് പോരാട്ടത്തില്‍ ബംഗളൂരുവിന് വിജയം. സ്വന്തം തട്ടകത്തില്‍ മറുപടിയില്ലാത്ത ഒറ്റ ഗോളിന് അവര്‍ അമ്ര ടീം കൊല്‍ക്കത്തയെ വീഴ്ത്തി. മറ്റൊരു മത്സരത്തില്‍ ചെന്നൈയിന്‍ എഫ്.സിയും ഡല്‍ഹി ഡൈനാമോസും 2-2ന് സമനിലയില്‍ പിരിഞ്ഞു.
സ്വന്തം തട്ടകത്തില്‍ ക്യാപ്റ്റന്‍ സുനില്‍ ഛേത്രി 39ാം മിനുട്ടില്‍ നേടിയ ഏക ഗോളിലാണ് ബംഗളൂരു വിജയം സ്വന്തമാക്കിയത്. ഒന്‍പത് കളികളില്‍ നിന്ന് ആറാം വിജയം സ്വന്തമാക്കി ബംഗളൂരു 18 പോയിന്റുമായി ഒന്നാം സ്ഥാനത്തേക്ക് കയറി.
തുടര്‍ തോല്‍വികളുമായി നട്ടംതിരിയുന്ന ഡല്‍ഹി ഡൈനാമോസ് ആശ്വാസ സമനില സ്വന്തമാക്കി. എവേ പോരാട്ടത്തില്‍ ജെജെ ലാല്‍പെഖുലയുടെ ഇരട്ട ഗോള്‍ മികവില്‍ വിജയത്തിലേക്ക് നീങ്ങിയ ചെന്നൈയിന്‍ എഫ്.സിയെ ഗുയോന്‍ ഫെര്‍ണാണ്ടസ് 90ാം മിനുട്ടില്‍ നേടിയ ഗോളിലാണ് ഡല്‍ഹി സമനിലയില്‍ പിടിച്ചത്.
24ാം മിനുട്ടില്‍ ഡേവിഡ് എന്‍ഗെയ്തയിലൂടെ ഡല്‍ഹി ലീഡെടുത്തെങ്കിലും 42, 51 മിനുട്ടുകളില്‍ ലാല്‍പെഖുല വല ചലിപ്പിച്ച് ലീഡ് ചെന്നൈയിന് അനുകൂലമാക്കി. കളി തീരാന്‍ നിമിഷങ്ങള്‍ മാത്രമുള്ളപ്പോഴാണ് ഡല്‍ഹി സമനില സ്വന്തമാക്കിയത്. സമനിലയോടെ ചെന്നൈയിന്‍ രണ്ടാം സ്ഥാനത്തേക്ക് കയറി.
ബഗാന്‍ വിജയ വഴിയില്‍
കൊല്‍ക്കത്ത: ഐ ലീഗ് പോരാട്ടത്തില്‍ മോഹന്‍ ബഗാന്‍ വിജയ വഴിയില്‍ തിരിച്ചെത്തി. മറുപടിയില്ലാത്ത രണ്ട് ഗോളുകള്‍ക്ക് അവര്‍ നിലവിലെ ചാംപ്യന്‍മാരായ ഐസ്വാളിനെ പരാജയപ്പെടുത്തി.
തുടര്‍ തോല്‍വികളെ തുടര്‍ന്ന് കോച്ച് സഞ്ജയ് സെന്നിനെ പുറത്താക്കി ശങ്കര്‍ലാല്‍ ചക്രബര്‍ത്തിക്ക് ചുമതല നല്‍കിയാണ് ബഗാന്‍ വിജയ വഴിയില്‍ മടങ്ങിയെത്തിയിരിക്കുന്നത്.
യുവന്റസ് മുന്നോട്ട്
മിലാന്‍: ഇറ്റാലിയന്‍ സീരി എ പോരാട്ടത്തില്‍ യുവന്റസിന് വിജയം. മറുപടിയില്ലാത്ത ഒറ്റ ഗോളിന് അവര്‍ കഗ്ലിയാരിയെ വീഴ്ത്തി. മത്സരത്തിനിടെ പ്രമുഖ താരങ്ങളായ പൗലോ ഡിബാലയേയും സമി ഖെദരിയേയും പരുക്കിനെ തുടര്‍ന്ന് പിന്‍വലിക്കേണ്ടി വന്നെങ്കിലും 74ാം മിനുട്ടില്‍ ബെര്‍ണാര്‍ഡേഷി നേടിയ ഗോളിലാണ് യുവന്റസ് വിജയിച്ചത്. അതേസമയം മറ്റൊരു മത്സരത്തില്‍ റോമയെ 1-2ന് അറ്റ്‌ലാന്റ അട്ടിമറിച്ചു.