വാഷിങ്ടണ്‍: മിസൈല്‍ പരീക്ഷണത്തിനു പിന്നാലെ ഇറാനുമായി വാക്‌പോരാട്ടം നടത്തിയ യു.എസ് ഇറാന് അപ്രഖ്യാപിത ഉപരോധം ഏര്‍പ്പെടുത്തി. ഇറാന്‍ ഉല്‍പന്നങ്ങള്‍ അമേരിക്ക തടഞ്ഞു. നേരത്തെ മിസൈല്‍ പരീക്ഷണത്തില്‍ ഇറാന് മുന്നറിയിപ്പുമായി ട്രംപ് രംഗത്തെത്തിയിരുന്നു. ഇറാന്‍ തീക്കൊള്ളി കൊണ്ട് കളിക്കുകയാണെന്ന് ട്രംപ് ട്വീറ്റ് ചെയ്തു. രണ്ടാമത്തെ ട്വീറ്റില്‍ മുന്‍ പ്രസിഡന്റ് ബരാക് ഒബാമ കാണിച്ച അത്രയും ദയ നിങ്ങളോട് എന്റെ ഭരണകൂടത്തിനുണ്ടാവില്ലെന്ന് ട്രംപ് വ്യക്തമാക്കി.
പരാമര്‍ശത്തെ തുടര്‍ന്ന് ട്രംപിന് മറുപടിയുമായി അധികം വൈകാതെ തന്നെ ഇറാന്‍ വിദേശകാര്യ മന്ത്രി മുഹമ്മദ് ജവാദ് ശരീഫ് രംഗത്തെത്തി. ഭീഷണിപ്പെടുത്തി ഇറാനെ കീഴടക്കാനാവില്ല. മിസൈല്‍ പരീക്ഷണത്തിന് ജനങ്ങളില്‍ നിന്നുള്ള പിന്തുണയുണ്ട്. യുദ്ധത്തിന് ആരുമായും താല്‍പര്യമില്ല. എന്നാല്‍ ഇറാന് സ്വന്തം രീതിയിലുള്ള പ്രതിരോധം ആവശ്യമാണെന്നും ശരീഫ് ട്വിറ്ററില്‍ കുറിച്ചു.
അതേസമയം മുസ്‌ലിം രാജ്യങ്ങളില്‍ നിന്നുള്ളവരെ വിലക്കാന്‍ തീരുമാനിച്ച ട്രംപിന്റെ നടപടിയെ തുടര്‍ന്ന് യു.എസ് റെസ്‌ലിങ് ടീമിന് രാജ്യത്തേക്കുള്ള പ്രവേശനം നിഷേധിച്ചതായി ഇറാന്‍ വിദേശകാര്യമന്ത്രാലയം വ്യക്തമാക്കി. ഇവര്‍ ഫ്രീസ്റ്റൈല്‍ ലോകകപ്പില്‍ കളിക്കാനെത്തിയതായിരുന്നു.