പെരിന്തല്‍മണ്ണ: റെയില്‍വേയുടെ ഇല്ലാത്ത കോഴ്‌സിന്റെ പേര് പറഞ്ഞ് രാജ്യത്തിന്റെ വിവിധ ഭാഗങ്ങളില്‍ നിന്ന് കോടിക്കണക്കിന് രൂപ തട്ടിയെടുത്ത തമിഴ്‌നാട് സ്വദേശി പിടിയില്‍. തമിഴ്‌നാട് കുഭകോണം സ്വദേശി പത്മനാഭനെ (54)യാണ് ചെന്നൈയില്‍ വച്ച് പെരിന്തല്‍മണ്ണ ഡിവൈ.എസ്.പി യുടെ കീഴിലുള്ള പ്രത്യേക സംഘം പിടികൂടിയത്. റെയില്‍വേ അംഗീകാരത്തോടെ റെയില്‍ സേഫ്റ്റി ഡിപ്‌ളോമ, ഡിഗ്രി കോഴ്‌സുകള്‍ ആള്‍ ഇന്ത്യ റെയില്‍വേ സേഫ്റ്റി കൗണ്‍സിലിന്റെ കീഴില്‍ ആരംഭിക്കുന്നുണ്ടെന്നും അതിന് ഫ്രാഞ്ചൈസി നല്‍കാമെന്നും പറഞ്ഞ് വിശ്വസിപ്പിച്ച് 68 ലക്ഷം രൂപ കൈപറ്റി തട്ടിപ്പ് നടത്തിയതിനാണ് പ്രതി പിടിയിലായത്.
പെരിന്തല്‍മണ്ണ ഡിവൈ.എസ്.പി എം.പി മോഹനചന്ദ്രന് ലഭിച്ച പരാതിയെ തുടര്‍ന്നായിരുന്നു അറസ്റ്റ്. കൂടുതല്‍ ചോദ്യം ചെയ്തതില്‍ പ്രതി ബംഗളൂരു, ചെന്നൈ, മുംബൈ തുടങ്ങിയ സ്ഥലങ്ങള്‍ കേന്ദ്രീകരിച്ച് രാജ്യത്തുടനീളം 2010 മുതല്‍ ഇതേ രീതിയിലുള്ള തട്ടിപ്പ് നടത്തിയതായി പൊലിസിനോട് സമ്മതിച്ചു. 2012 ല്‍ തേനിയില്‍ ഇതേ കുറ്റത്തിന് പ്രതിയെ അറസ്റ്റ് ചെയ്തിട്ടുണ്ട് . ആള്‍ഇന്ത്യ റെയില്‍വേ സേഫ്റ്റി കൗണ്‍സില്‍ എന്നത് ഒരു സോഷ്യല്‍ സര്‍വിസ് സംഘടനയായിട്ടാണ് രജിസ്റ്റര്‍ ചെയ്തിട്ടുള്ളത്. വിദ്യാഭ്യാസ സ്ഥാപനങ്ങള്‍, കോഴ്‌സുകള്‍ എന്നിവ നടത്തുവാനുള്ള അംഗീകാരം ഇതിനില്ല.