തിരുവനന്തപുരം: ജീവനക്കാരുമായി ചര്‍ച്ച ചെയ്യാതെ കേരള അഡ്മിനിസ്‌ട്രേറ്റീവ് സര്‍വിസ് (കെ.എ.എസ്) നടപ്പാക്കാനുള്ള സര്‍ക്കാര്‍ തീരുമാനം ഗുണത്തേക്കാളേറെ ദോഷം ചെയ്യുമെന്ന് മുന്‍ മുഖ്യമന്ത്രി ഉമ്മന്‍ചാണ്ടി. കെ.എ.എസ് നടപ്പാക്കാനുള്ള സര്‍ക്കാറിന്റെ ഏകപക്ഷീയ നടപടിയില്‍ പ്രതിഷേധിച്ച് ആക്ഷന്‍ കൗണ്‍സിലിന്റെ നേതൃത്വത്തില്‍ സെക്രട്ടറിയറ്റിന് മുന്നില്‍ സംഘടിപ്പിച്ച ഏകദിന കൂട്ട ഉപവാസം ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ സര്‍ക്കാറിന്റെ കാലത്ത് കൈക്കൊണ്ട തീരുമാനങ്ങള്‍ക്കെതിരേ ശക്തമായി സമരം ചെയ്തവര്‍ ഇന്ന് അതെല്ലാം നടപ്പാക്കാനൊരുങ്ങുന്നു.
കഴിഞ്ഞ യു.ഡി.എഫ് സര്‍ക്കാര്‍ കെ.എ.എസ് നടപ്പാക്കുള്ള തീരുമാനം കൈക്കൊണ്ടിരുന്നു. ജീവനക്കാരുമായും അവരുടെ സംഘടനകളുമായും നിരവധി തവണ ചര്‍ച്ച ചെയ്താണ് അത്തരമൊരു തീരുമാനം കൈക്കൊണ്ടത്. പക്ഷേ, അതില്‍ നിന്ന് സെക്രട്ടറിയറ്റിനെ ഒഴിവാക്കിയാണ് തീരുമാനമെടുത്തത്. എങ്കിലും പ്രതിഷേധങ്ങള്‍ ഉയര്‍ന്നത് കാരണം നടപ്പാക്കിയില്ല.
സര്‍ക്കാര്‍ ജീവനക്കാരെ വിശ്വാസത്തിലെടുത്തവേണം ഒരു ജനാധിപത്യ സര്‍ക്കാര്‍ തീരുമാനങ്ങള്‍ എടുക്കാന്‍. ഇന്നത്തെ അവസ്ഥ അതല്ല. ജീവനക്കാരുടെ പ്രതിഷേധതത്തില്‍ ഭരണം സ്തംഭനത്തിലാണെന്നും ഉമ്മന്‍ചാണ്ടി പറഞ്ഞു.
എം. വിന്‍സെന്റ് എം.എല്‍.എ, ആക്ഷന്‍ കൗണ്‍സില്‍ കണ്‍വീനര്‍ കെ ബെന്‍സി, സെക്രട്ടറിയറ്റ് അസോസിയേഷന്‍ ജനറല്‍ സെക്രട്ടറി ടി ശ്രീകുമാര്‍, ട്രഷറര്‍ എസ്.എസ് ലളിത്, സെക്രട്ടറിയേറ്റ് ഫിനാന്‍സ് അസോ. പ്രസിഡന്റ് ഗോപകുമാര്‍, സെക്രട്ടറി പ്രദീപ് കുമാര്‍, വനിതവേദി പ്രസിഡന്റ് എന്‍ റീജ, സെക്രട്ടറി പ്രസീന, സെക്രട്ടറിയറ്റ് ഫിനാന്‍സ് അസോ. മുന്‍ പ്രസിഡന്റ് ഇ. അബ്ദുല്‍ വഹാബ്, ലെജിസ്ലേറ്റിവ് സെക്രട്ടേറിയറ്റ് ഓര്‍ഗനൈസേഷന്‍ പ്രസിഡന്റ് നൗഷാദ് സംസാരിച്ചു.