പട്‌ന: കാലിത്തീറ്റ കുംഭകോണക്കേസില്‍ മൂന്നര വര്‍ഷം ജയില്‍ ശിക്ഷക്ക് വിധിക്കപ്പെട്ട ആര്‍.ജെ.ഡി അധ്യക്ഷന്‍ ലാലുപ്രസാദ് യാദവ് മിര്‍സമുണ്ട ജയിലില്‍ എത്തുന്നതിന് മുന്‍പുതന്നെ അദ്ദേഹത്തിന്റെ സഹായികള്‍ ജയിലിലെത്തിയിരുന്നുവെന്ന് വെളിപ്പെടുത്തല്‍.
റാഞ്ചിയിലെ പ്രത്യേക സി.ബി.ഐ കോടതിയാണ് ലാലുവിനെ കഴിഞ്ഞ ഡിസംബര്‍ 23ന് മൂന്നര വര്‍ഷത്തെ തടവു ശിക്ഷക്ക് വിധിച്ചത്. ലാലു ജയിലില്‍ എത്തുന്നതിന് മണിക്കൂറുകള്‍ക്ക് മുന്‍പാണ് അദ്ദേഹത്തിന്റെ പാചകക്കാരന്‍ ലക്ഷ്മണ്‍ മഹാതോ, പരിചാരകന്‍ മദന്‍ യാദവ് എന്നിവര്‍ ഇവിടെയെത്തിയത്.
അയല്‍വാസിയെ മര്‍ദ്ദിക്കുകയും പണം തട്ടിയെടുക്കുകയും ചെയ്തുവെന്നാണ് ഇരുവര്‍ക്കുമെതിരായ കേസ്. റാഞ്ചിയിലെ ഒരാളാണ് തന്നെ മര്‍ദ്ദിക്കുകയും 10,000 രൂപ കൊള്ളയടിക്കുകയും ചെയ്തുവെന്ന് കാണിച്ച് ലാലുവിന്റെ ആശ്രിതര്‍ക്കെതിരേ പരാതി നല്‍കിയത്. എന്നാല്‍ റാഞ്ചിയിലെ ദൊരേന്ദ പൊലിസ് കേസ് രജിസ്റ്റര്‍ ചെയ്യാന്‍ തയാറാകാതിരുന്നതിനെ തുടര്‍ന്ന് പരാതിക്കാരന്‍ തൊട്ടടുത്ത ലോവര്‍ ബസാര്‍ പൊലിസില്‍ പരാതി നല്‍കി. ഇതേതുടര്‍ന്നാണ് ഇരുവരേയും അറസ്റ്റ് ചെയ്ത് ബിര്‍സമുണ്ട ജയിലിലാക്കിയത്.
എന്നാല്‍ ഈ രണ്ട് ആശ്രിതരും നേരത്തെ ലാലുവിനൊപ്പമായിരുന്നുവെന്നും ഇപ്പോള്‍ ഇവര്‍ കന്നുകാലികളെ വളര്‍ത്തിയാണ് ജീവിക്കുന്നതെന്നുമാണ് വിവരം.