ചെന്നൈ: എ.ഐ.എ.ഡി.എം.കെ ജനറല്‍ സെക്രട്ടറി ശശികല നടരാജന്‍ തമിഴ്‌നാട് മുഖ്യമന്ത്രിയായി ചുമതലയേല്‍ക്കാന്‍ ഒരുങ്ങുന്നതിനിടയില്‍ സര്‍ക്കാര്‍ ഉപദേഷ്ടാവ് ഷീല ബാലകൃഷ്ണന്‍ സ്ഥാനമൊഴിഞ്ഞു.
ശശികല മുഖ്യമന്ത്രി സ്ഥാനത്തേക്ക് എത്തുമെന്ന സൂചന ശക്തമായതോടെയാണ് കാലാവധി പൂര്‍ത്തിയാകും മുന്‍പ് സര്‍ക്കാര്‍ ഉപദേഷ്ടാവ് സ്ഥാനത്തുനിന്നും ഷീല ബാലകൃഷ്ണന്‍ പടിയിറങ്ങുന്നത്.
ഷീലക്കൊപ്പം ജയയുടെ വിശ്വസ്തരായിരുന്ന കെ.എന്‍ വെങ്കട്ടരാമനും, എ. രാമലിംഗവും സെക്രട്ടറി സ്ഥാനം ഒഴിയാന്‍ കത്ത് നല്‍കിയതോടെ സ്ഥാനം ഒഴിയാന്‍ അനുമതി നല്‍കിയുള്ള ഉത്തരവ് മുഖ്യമന്ത്രിയുടെ ഓഫിസ് പുറത്തുവിടുകയും ചെയ്തിട്ടുണ്ട്.
1976ലെ ഐ.എ.എസ് കേഡറിലുള്ള തിരുവനന്തപുരം സ്വദേശി ഷീല ബാലകൃഷ്ണന്‍ തഞ്ചാവൂരില്‍ അസിസ്റ്റന്റ് കളക്ടറായാണ് ഔദ്യോഗിക ജീവിതം ആരംഭിച്ചത്.
2014ല്‍ ചീഫ് സെക്രട്ടറിയായി വിരമിച്ച ഷീലയെ പിറ്റേ ദിവസം തന്നെ മുഖ്യമന്ത്രിയുടെ പ്രത്യേക ഉപദേഷ്ടാവായി ജയലളിത നിയമിക്കുകയായിരുന്നു.