തിരുവനന്തപുരം: സമരഭൂമിയെ സര്‍ക്കാര്‍ കലാപ ഭൂമിയാക്കരുതെന്ന് കോണ്‍ഗ്രസ് നേതാവ് കെ. മുരളീധരന്റെ മുന്നറിയിപ്പ്. ലോ അക്കാദമിയില്‍ ക്ലാസു തുടങ്ങുന്നതിനെതിരെയാണ് മുരളീധരന്‍ രംഗത്തെത്തിയത്. സമരങ്ങളെ ഒറ്റുകൊടുത്ത പാരമ്പര്യമാണ് എസ്.എഫ്.ഐക്കുള്ളത്. തിങ്കളാഴ്ച ക്ലാസ് തുടങ്ങിയാല്‍ നേരിടുമെന്നും അദ്ദേഹം ആവര്‍ത്തിച്ചു. ലോ അക്കാദമി പ്രിന്‍സിപ്പല്‍ ലക്ഷ്മി നായര്‍ രാജിവെക്കണമെന്നാവശ്യപ്പെട്ട് വിദ്യാര്‍ഥികള്‍ നടത്തുന്ന സമരത്തിന് പിന്തുണ പ്രഖ്യാപിച്ച് നിരാഹാര സമരം നടത്തുകയാണ് കെ. മുരളീധരന്‍.

നടരാജപിള്ളയെ അറിയില്ലെന്ന മുഖ്യമന്ത്രിയുടെ പ്രസ്താവന അപലപനീയമാണ്. ആദരണീയനായ രാഷ്ട്രീയ നേതാവായിരുന്നു അദ്ദേഹം. എ.കെ.ജി സെന്ററില്‍ വല്ല പുസ്തകവുമുണ്ടെങ്കില്‍ മുഖ്യമന്ത്രി അതെടുത്ത് വായിക്കണമെന്നും മുരളീധരന്‍ പരിഹസിച്ചു.

സമരം 26ാം ദിവസത്തിലേക്ക് കടന്നിരിക്കുകയാണ്. ബി.ജെ.പി നേതാവ് വി.വി. രാജേഷും നിരാഹാരമിരിക്കുന്നുണ്ട്. വിദ്യാര്‍ഥി സമരം പരിഹരിക്കാന്‍ കഴിഞ്ഞ ദിവസം വിദ്യാഭ്യാസമന്ത്രി സി. രവീന്ദ്രനാഥ് വിളിച്ച രണ്ടാംവട്ട ചര്‍ച്ചയും പരാജയപ്പെട്ടിരുന്നു. പ്രിന്‍സിപ്പല്‍ ലക്ഷ്മി നായരെ അഞ്ച് വര്‍ഷത്തേക്ക് മാറ്റിനിര്‍ത്താനുള്ള മാനേജ്‌മെന്റ് നിലപാട് അംഗീകരിക്കണമെന്നായിരുന്നു മന്ത്രിയുടെ നിര്‍ദേശം. എന്നാല്‍ രാജിയില്‍ കുറഞ്ഞുള്ള ഒത്തുതീര്‍പ്പിനില്ലെന്നാണ് സമരക്കാരുടെ പക്ഷം. ചര്‍ച്ച വഴിമുട്ടിയതോടെ സമരം പിന്‍വലിച്ച് തിങ്കളാഴ്ച ക്ലാസ് തുടങ്ങാനുള്ള സാഹചര്യം ഒരുക്കണമെന്നാവശ്യപ്പെട്ട മന്ത്രി ചര്‍ച്ച അവസാനിപ്പിച്ച് ക്ഷുഭിതനായി ഇറങ്ങിപ്പോയി. ഇതോടെ സമരം ശക്തമായി മുന്നോട്ടുകൊണ്ടുപോകുമെന്ന് സമരസമിതി പ്രഖ്യാപിക്കുകയായിരുന്നു.