കുമ്പള(കാസര്‍കോട്): 19 കിലോ കഞ്ചാവുമായി തിരുവനന്തപുരം സ്വദേശി കുമ്പളയില്‍ എക്‌സൈസ് അധികൃതരുടെ പിടിയിലായി. തിരുവനന്തപുരം നെയ്യാറ്റിന്‍കര ഉച്ചക്കട സ്വദേശി കിഴക്കേ പുത്തന്‍ വീട്ടില്‍ എം രതീഷ്(37)ആണ് അറസ്റ്റിലായത്.   ഇന്നലെ രാവിലെ 7.30 ഓടെ കുമ്പള റെയില്‍വേ സ്‌റ്റേഷന്‍ പരിസരത്തുവച്ച് 18.750 കി ഗ്രാം കഞ്ചാവുമായാണ് രതീഷിനെ പിടികൂടിയത്. എക്‌സൈസ് ഇന്‍സ്‌പെക്ടര്‍ പി ജെ റോബിന്‍ ബാബുവിന്റെ നേതൃത്വത്തിലാണ് റെയ്ഡ് നടന്നത്.
വലിയ ബാഗിലും സ്യൂട്ട് കേസിലുമാണ് കഞ്ചാവ് സൂക്ഷിച്ചിരുന്നത്. ഓരോ സ്ഥലത്ത് വിതരണം ചെയ്യാനായി ഓരോ കിലോ വീതമുള്ള 19 പാക്കറ്റിലാണ് കഞ്ചാവ് കണ്ടെത്തിയത്. പിടികൂടിയ കഞ്ചാവിന്  ഏകദേശം 40 ലക്ഷം രൂപ വില വരുമെന്ന് എക്‌സൈസ്  അധികൃതര്‍ പറഞ്ഞു. ആന്ധ്രയിലെ മാവോയിസ്റ്റ് കേന്ദ്രത്തില്‍ നിന്നാണ് കഞ്ചാവെത്തിച്ചതെന്നാണ് പ്രതിയില്‍ നിന്ന് ലഭിച്ച വിവരം. രണ്ടുവര്‍ഷം മുന്‍പ് 10 കിലോ കഞ്ചാവുമായി പൊലിസ് ഇയാളെ പിടികൂടിയിരുന്നു.