തൊടുപുഴ: അടിമാലി രാജധാനി ലോഡ്ജ് കൂട്ടക്കൊല കേസില്‍ ഇതര സംസ്ഥാനക്കാരായ മൂന്നു പ്രതികള്‍ക്ക് ഇരട്ട ജീവപര്യന്തവും 17 വര്‍ഷം തടവും. കര്‍ണാടകയിലെ തുംകുരു ബുക്കാപ്പട്ടണം സ്വദേശി രാഘവേന്ദ്ര (23), സിറ ഹനുമന്തപുരം സ്വദേശി മധു (രാഗേഷ് ഗൗഡ -26) മധുവിന്റെ സഹോദരന്‍ മഞ്ജുനാഥ് (21) എന്നിവരെയാണ് തൊടുപുഴ അഡി. സെഷന്‍സ് കോടതി ജഡ്ജി വി.ജി ശ്രീദേവി ശിക്ഷിച്ചത്.
അടിമാലി രാജധാനി ലോഡ്ജ് നടത്തിപ്പുകാരന്‍ പാറേക്കാട്ടില്‍ കുഞ്ഞുമുഹമ്മദ് (69), ഭാര്യ ഐഷ (63), ഐഷയുടെ മാതാവ് അടിമാലി മണലിക്കുടി നാച്ചി (80) എന്നിവരാണ് കൊല്ലപ്പെട്ടത്. കൊലപാതകത്തിന് ശേഷം പത്തൊമ്പതര പവന്‍ സ്വര്‍ണാഭരണം, പണം, മൊബൈല്‍ ഫോണ്‍, റാഡോ വാച്ച് തുടങ്ങിയവയും കവര്‍ന്നിരുന്നു. കൊലപാതകക്കേസില്‍ ഇരട്ട ജീവപര്യന്തവും അതിക്രമിച്ചു കയറല്‍, കൊള്ള, തെളിവു നശിപ്പിക്കല്‍ എന്നിവയ്ക്കാണ് പതിനായിരം രൂപാ വീതം പിഴയും 17 വര്‍ഷം തടവുമാണ് ശിക്ഷ.
2015 ഫെബ്രുവരി 12 രാത്രി 11.45 നാണ് കേസിനാസ്പദമായ സംഭവം. 13ന് പുലര്‍ച്ചെ അഞ്ചുമണിയോടെയാണ് നാടിനെ നടുക്കിയ കൊടുംക്രൂരത പുറംലോകം അറിയുന്നത്. രാജധാനി ലോഡ്ജിലെ മൂന്നാം നിലയിലുള്ള 302 ാം നമ്പര്‍ മുറിക്കകത്ത് കൈകാലുകളും വായും ബന്ധിച്ചനിലയിലാണ് കുഞ്ഞുമുഹമ്മദിന്റെ മൃതദേഹം പൊലിസ് കണ്ടെത്തിയത്. മുറി പുറമെനിന്നും പൂട്ടിയ അവസ്ഥയിലുമായിരുന്നു. ഐഷയുടെയും നാച്ചിയുടെയും മൃതദേഹങ്ങള്‍ ലോഡ്ജിലെ ഒന്നാം നിലിയില്‍ കിടപ്പുമുറിയായി ഉപയോഗിക്കുന്ന ഹാളില്‍ രണ്ടിടങ്ങളിലായാണ് കണ്ടെത്തിയത്.
ലോഡ്ജിലെ താമസക്കാരുടെ രജിസ്റ്ററുകള്‍ വരെ കീറിയാണ് പ്രതികള്‍ കടന്നു കളഞ്ഞത്. ലോഡ്ജിനു സമീപത്തെ പലചരക്കു വ്യാപാര സ്ഥാപനത്തിലെ നിരീക്ഷണ കാമറയില്‍ നിന്ന് ഇതര സംസ്ഥാന തൊഴിലാളികളുടേതെന്ന് തോന്നിക്കുന്ന വ്യക്തതയില്ലാത്ത ചിത്രങ്ങള്‍ മാത്രമാണ് പൊലിസിന് ലഭിച്ചത്. കേസിന്റെ തുടക്കത്തില്‍ തന്നെ എസ്.ഐയുടെ നേതൃത്വത്തിലുള്ള അന്വേഷണത്തില്‍ വിഴ്ച സംഭവിച്ചതായി ആരോപിച്ച് വന്‍ പ്രതിഷേധങ്ങളാണ് അടിമാലിയില്‍ അരങ്ങേറിയത്. തുടര്‍ന്ന് ഉന്നത പൊലിസ് ഉദ്യോഗസ്ഥര്‍ നേരിട്ടെത്തി അന്നത്തെ മൂന്നാര്‍ ഡിവൈ.എസ്.പി കെ.ബി പ്രഫുല്ലചന്ദ്രന്‍, അടിമാലി സി.ഐ സജി മാര്‍ക്കോസ് എന്നിവരുടെ നേതൃത്വത്തിലുള്ള പ്രത്യേക സംഘത്തെനിയമിക്കുകയായിരുന്നു.