ജബല്‍പൂര്‍: പാര്‍ട്ടിക്കും പ്രധാനമന്ത്രി നരേന്ദ്ര മോദിക്കുമെതിരേ ശക്തമായ വിമര്‍ശനവുമായി മുതിര്‍ന്ന ബി.ജെ.പി നേതാവും മുന്‍കേന്ദ്ര മന്ത്രിയുമായ യശ്വന്ത് സിന്‍ഹ. 13 മാസത്തിലധികമായി പ്രധാനമന്ത്രിയെ കാണാന്‍ താന്‍ അവസരം ചോദിക്കുന്നു. ഇതുവരെ അതിനുള്ള അനുമതി അദ്ദേഹം നല്‍കിയിട്ടില്ല. ഈ സാഹചര്യത്തില്‍ ഇനി പ്രധാനമന്ത്രിക്കുവേണ്ടിയോ കേന്ദ്ര സര്‍ക്കാരുമായി ബന്ധപ്പെട്ട ആരെങ്കിലുമായോ ബി.ജെ.പി നേതാക്കളുമായോ ഒരുതരത്തിലുള്ള ചര്‍ച്ചക്കോ കൂടിക്കാഴ്ചക്കോ തയാറല്ലെന്നും അദ്ദേഹം പറഞ്ഞു.
മുന്‍പ്രധാനമന്ത്രി എ.ബി വാജ്‌പെയ്, മുതിര്‍ന്ന നേതാവ് എല്‍.കെ അദ്വാനി എന്നിവരുമായി കൂടിക്കാഴ്ച നടത്താന്‍ ആര്‍ക്കും ഇതുപോലെ കാത്തിരിക്കേണ്ടി വന്നിട്ടില്ല. അവരുടെ പെരുമാറ്റം അത്രയും സുതാര്യമാണ്. അവരെപോലെ ഒരൊറ്റ നേതാക്കളും ഇന്ന് ബി.ജെ.പിയിലില്ലെന്നും അദ്ദേഹം തുറന്നടിച്ചു. മാടമ്പി സ്വഭാവമാണ് ഇന്നത്തെ പാര്‍ട്ടിനേതാക്കള്‍ക്കുള്ളത്.
അദ്വാനി പാര്‍ട്ടി അധ്യക്ഷനായിരിക്കെ സാധാരണ പ്രവര്‍ത്തകര്‍ക്കുപോലും മുന്‍കൂട്ടി അനുവാദം വാങ്ങിക്കാതെ ഡല്‍ഹിയിലെത്തി അദ്ദേഹത്തെ സന്ദര്‍ശിക്കാമായിരുന്നു. എന്നാല്‍ ഇന്ന് അങ്ങനെയല്ല. പാര്‍ട്ടി അധ്യക്ഷന്‍ അമിത്ഷായെ കാണാന്‍ മുതിര്‍ന്ന നേതാക്കള്‍ക്കുപോലും കഴിയില്ല. കഴിഞ്ഞ 13 മാസക്കാലം കാത്തിരുന്നിട്ടും പ്രധാനമന്ത്രിയെ കാണാന്‍ കഴിയാത്തതില്‍ തനിക്ക് അത്ഭുതമില്ലെന്നും സിന്‍ഹ രാജസ്ഥാനിലെ ജബല്‍പൂരില്‍ മാധ്യമങ്ങളോടു പറഞ്ഞു.
വിവിധ പ്രശ്‌നങ്ങളെക്കുറിച്ച് പ്രധാനമന്ത്രി മോദിയുമായി ചര്‍ച്ച നടത്താനായിട്ടാണ് താന്‍ അനുവാദം ചോദിച്ചിരുന്നത്. ഇതുവരെ തനിക്ക് അതിനുള്ള സമയം അദ്ദേഹം അനുവദിച്ചില്ല. ഇനി അദ്ദേഹവുമായോ സര്‍ക്കാരിന്റെ മറ്റേതെങ്കിലും പ്രതിനിധിയുമായോ ഒരു തരത്തിലുള്ള ചര്‍ച്ചക്കും ഇനി താനില്ല. തനിക്ക് പറയാനുള്ള കാര്യങ്ങള്‍ പൊതുജനങ്ങള്‍ക്ക് മുന്‍പില്‍ വ്യക്തമാക്കാനാണ് ഇനിയുള്ള തീരുമാനം.
ഒരിക്കല്‍ ഒരു പരിപാടിയില്‍ പാര്‍ട്ടി അധ്യക്ഷന്‍ അമിത്ഷാ, രാജ്‌നാഥ് സിങ്, അനന്ത് കുമാര്‍, സുഷമ സ്വരാജ് തുടങ്ങിയവരെല്ലാം പങ്കെടുത്ത ഫോട്ടോ കണ്ടു. ഇതില്‍ ഏറ്റവും പിന്‍നിരയിലാണ് മുതിര്‍ന്ന നേതാവ് എല്‍.കെ അദ്വാനിക്ക് ഇരിപ്പിടം നല്‍കിയത്. അപ്രധാനികള്‍ക്കിടയില്‍ ഒരു സാധാരണ തൊഴിലാളിയെ പോലെയാണ് അദ്ദേഹത്തെ അമിത്ഷായും മറ്റും പരിഗണിച്ചതെന്നും യശ്വന്ത് സിന്‍ഹ ആരോപിച്ചു.
ഇന്ന് നര്‍സിങ്പൂര്‍ ജില്ലയില്‍ നടക്കുന്ന കര്‍ഷക റാലിയില്‍ സംബന്ധിക്കാനായാണ് അദ്ദേഹം രാജസ്ഥാനില്‍ എത്തിയത്.