തളിപ്പറമ്പ്: പരിയാരം തൊണ്ടന്നൂരില്‍ വ്യാപകമായി മണ്ണ് കടത്താനുള്ള മണ്ണ് മാഫിയകളുടെ ശ്രമം നാട്ടുകാര്‍ തടഞ്ഞു. തൊണ്ടന്നൂരില്‍ പുതിയ പള്ളിക്ക് സമീപത്തുള്ള കുന്നുകളും മറ്റും വ്യാപകമായി ഇടിച്ചു നിരത്തി മണ്ണ് കടത്തി വില്‍പ്പന നടത്തുകയാണ് ചെയ്യുന്നത്. കുടിവെള്ള ക്ഷാമം രൂക്ഷമായ പ്രദേശമാണ് തൊണ്ടന്നൂര്‍. ദിവസവും 15ലധികം ടിപ്പറുകളിലായാണ് മണ്ണിടിച്ച് കടത്തിയുള്ള വില്‍പ്പന തകൃതിയായി നടക്കുന്നത്. ഇത് സംബന്ധിച്ച് നാട്ടുകാര്‍ അധികൃതരെ പലതവണ വിവരമറിയിച്ചിരുന്നു. അതിനെതിരെ അധികൃതരുടെ ഭാഗത്തു നിന്നും നടപടി ഇല്ലാതായതോടെയാണ് നാട്ടുകാര്‍ നേരിട്ട് രംഗത്തിറങ്ങി അനധികൃത മണ്ണ് കടത്ത് തടഞ്ഞത്. ഉദ്യോഗസ്ഥ-പൊലിസ് സംവിധാനങ്ങളില്‍ ഉന്നത സ്വാധീനമുള്ളവരാണ് മണ്ണ് കടത്തലിന് പിറകിലെന്ന് നാട്ടുകാര്‍ ആരോപിച്ചു. നാട്ടുകാര്‍ അനധികൃത മണ്ണ് കടത്ത് തടഞ്ഞ വിവരമറിഞ്ഞ് പരിയാരം പൊലിസ് സ്ഥലത്തെത്തി. രണ്ട് ടിപ്പറുകളും കസ്റ്റഡിയിലെടുത്തു.