തിരുവനന്തപുരം:കാഴ്ചയുടെ വസന്തമൊരുക്കിയ തിരുവനന്തപുരം പുഷ്പമേളയില്‍ ജനതിരക്കേറുന്നു.ഇതര ജില്ലകളില്‍ നിന്നുവരെ സന്ദര്‍ശകരെത്തുന്നുണ്ട്. ദേശീയവും വിദേശിയവുമായ 18000ല്‍ പരം പുഷ്പങ്ങളാണ് കനകക്കുന്ന് കൊട്ടാരവളപ്പില്‍ ഒരുക്കിയിരിക്കുന്നത്. വിവിധയിനം റോസകളും ഡാലിയയും ആന്തൂറിയവും ഓര്‍ക്കിഡുമെല്ലാം മനംകവരുന്ന കാഴ്ചയാണ് സമ്മാനിക്കുന്നത്. പൂക്കളെക്കൂടാതെ നാട്ടുതൈകളുടെ വിപുലമായ ശേഖരവും മേളയുടെ പ്രത്യേകതയാണ്. മലയാളിക്ക് അന്യമാകുന്ന ഔഷധ സസ്യങ്ങളുമുണ്ട്.
കര്‍ഷകര്‍ക്ക് മികച്ച വിപണി സാധ്യത ലക്ഷ്യമിട്ടുള്ള കാര്‍ഷിക പ്രദര്‍ശനവും വിപണനവും മേളയുടെ ഭാഗമാണ്.
കുട്ടികള്‍ക്കായുള്ള പുഷ്പാലംകൃത ഫാഷന്‍ ഷോ മേളയുടെ പ്രധാന ആകര്‍ഷണമാകുന്നു. പ്രകൃതിയോടിണങ്ങുന്ന ലാന്‍ഡ്‌സ്‌കേപ്പിങ്‌ഷോയില്‍ ഡിനോസര്‍, പുലി, സിംഹം തുടങ്ങിയ മൃഗങ്ങളുടെ രൂപത്തില്‍ അലങ്കരിച്ചിരിക്കുന്ന പുഷ്പങ്ങള്‍ കൗതുകമുണര്‍ത്തുന്നതാണ്.
ഫുഡ് കോര്‍ട്ട്, കുടുംബത്തോടൊപ്പം ഉല്ലസിക്കാനായി അമ്യൂസ്‌മെന്റ് പാര്‍ക്ക്, കണ്‍സ്യൂമര്‍ എക്‌സ്‌പോ, ഓട്ടോമൊബൈല്‍ എക്‌സ്‌പോ തുടങ്ങിയവയും മേളയിലുണ്ട്. ഈ മാസം ഒന്‍പതിന് സമാപിക്കും.