ചക്കരക്കല്‍: മുണ്ടേരി പഞ്ചായത്ത് ഒന്നാം വാര്‍ഡില്‍ കൊരഞ്ഞി വയലില്‍ ഉപ്പുവെള്ളം കയറി അഞ്ചേക്കറോളം നെല്‍ കൃഷി നശിച്ചു. കാട്ടമ്പള്ളി പദ്ധതി പ്രദേശത്തു നിന്നു വേലിയേറ്റസമയത്ത് ഉപ്പുവെള്ളം കയറിയാണ് കതിരിട്ട നെല്‍കൃഷി നശിച്ചത്.
ടി.എം അബ്ദുല്‍ ഹമീദ്, അബ്ദുല്ലക്കുട്ടി, റൈജു മാസ്റ്റര്‍,അബ്ദുല്‍ ഖാദര്‍ തുടങ്ങിയ കര്‍ഷകര്‍ ബാങ്കില്‍ നിന്നു വായ്പയെടുത്താണു കൃഷിയിറക്കിയത്. പഞ്ചായത്ത്, കൃഷിവകുപ്പ് ഉദ്യോഗസ്ഥരുടെ ശ്രദ്ധയില്‍ പെടുത്തിയിട്ടും നടപടികള്‍ ഉണ്ടായിട്ടില്ലെന്നു കര്‍ഷകര്‍ പറഞ്ഞു. ഉപ്പുവെളളം കയറാതിരിക്കാന്‍ തടയണ നിര്‍മിക്കാന്‍ നടപടി വേണമെന്നാണ് ആവശ്യം.