കൊല്ലം: എന്‍.സി.പിയില്‍ ലയിച്ച് മന്ത്രിയാകാനുള്ള കോവൂര്‍ കുഞ്ഞുമോന്‍ എം.എല്‍.എയുടെ നീക്കത്തിന് തടയിട്ട് പാര്‍ട്ടി നേതൃത്വം. സ്വതന്ത്രനായി മല്‍സരിച്ചവര്‍ക്ക് മറ്റു രാഷ്ട്രീയ പാര്‍ട്ടിയില്‍ ലയിച്ച് മന്ത്രിയാകാന്‍ കഴിയില്ലെന്ന നിയമവശം ഉന്നയിച്ച് നിയമയുദ്ധത്തിനൊരുങ്ങുകയാണ് പാര്‍ട്ടിയിലെ ഒരു വിഭാഗം.
കുറേ നാളുകളായി ആര്‍.എസ്.പി ലെനിനിസ്റ്റുമായി സ്വരച്ചേര്‍ച്ചയിലല്ലാത്ത പാര്‍ട്ടി അസി.സെക്രട്ടറികൂടിയായ കുഞ്ഞുമോന്‍ ആര്‍.എസ്.പി ലെനിനിസ്റ്റിന്റെ പേരില്‍ മന്ത്രിയാകേണ്ടെന്ന് ആവശ്യവുമായി സംസ്ഥാന ജനറല്‍ സെക്രട്ടറി അമ്പലത്തറ ശ്രീധരന്‍നായരും രംഗത്തെത്തി.
2001 മുതല്‍ ജില്ലയിലെ സംവരണമണ്ഡലമായ കുന്നത്തൂരില്‍ നിന്നുള്ള നിയമസഭാംഗമാണ് കുഞ്ഞുമോന്‍. കഴിഞ്ഞ പാര്‍ലമെന്റ് തെരഞ്ഞെടുപ്പിനോടനുബന്ധിച്ച് സീറ്റ് ലഭിക്കാത്തതില്‍ പ്രതിഷേധിച്ച് ആര്‍.എസ്.പി ഇടതുമുന്നണി വിട്ടപ്പോള്‍ പാര്‍ട്ടി എം. എല്‍. എയായിരുന്ന കുഞ്ഞുമോനും യു.ഡി.എഫിലെത്തിയിരുന്നു. ഇടക്ക് ഡെപ്യൂട്ടീ സ്പീക്കര്‍ സ്ഥാനം കുഞ്ഞുമോന് യു.ഡി.എഫ് നല്‍കാന്‍ തീരുമാനിച്ചിരുന്നെങ്കിലും പാര്‍ട്ടിയിലെ ഒരു വിഭാഗം എതിര്‍ത്തു.
അന്നു തൊട്ട് നേതൃത്വവുമായി ഇടഞ്ഞുനിന്ന കുഞ്ഞുമോന്‍ കഴിഞ്ഞ നിയമസഭാ തെരഞ്ഞെടുപ്പ് അടുത്തവേളയിലാണ് ആര്‍.എസ്.പി ലെനിനിസ്റ്റ് രൂപീകരിച്ച് വീണ്ടും ഇടതുമുന്നണിയിലെത്തിയത്. ഇടതു സ്വന്തന്ത്രനായി മല്‍സരിച്ച കുഞ്ഞുമോന്‍ തുടര്‍ച്ചയായി നാലാമതും കുന്നത്തൂരില്‍ നിന്നു തെരഞ്ഞെടുക്കപ്പെടുകയായിരുന്നു. മുന്നണി ഘടക കക്ഷിയല്ലാത്തതിനാല്‍ കോരളാ കോണ്‍ഗ്രസ് ബിയിലെ ഗണേഷ്‌കുമാര്‍,സി.എം.പിയിലെ എന്‍. വിജയന്‍പിള്ള എന്നിവര്‍ക്കൊപ്പം കുഞ്ഞുമോനെയും ഇടതുമുന്നണി മന്ത്രിസ്ഥാനത്തിന് പരിഗണിച്ചിരുന്നില്ല. എന്നാല്‍ എന്‍.സി.പിയുടെ രണ്ടു എം.എല്‍.എമാരും കേസില്‍പ്പെട്ടതിനാല്‍ കുഞ്ഞുമോനെ, എന്‍.സി.പിയില്‍ ലയിപ്പിച്ച് മന്ത്രിയാക്കാനുള്ള നീക്കം ശക്തമായതോടെയാണ് കുഞ്ഞുമോനെതിരെ പാര്‍ട്ടി രംഗത്തെത്തിയത്. കുഞ്ഞുമോനെതിരേ ഇടതുമുന്നണിക്ക് പരാതി നല്‍കുമെന്നും യു.ഡി.എഫിനൊപ്പം നില്‍ക്കുന്ന ആര്‍.എസ്.പി ഇടതുമുന്നണിയിലേക്ക് മടങ്ങണമെന്നും ശ്രീധരന്‍നായര്‍ പറഞ്ഞു.