മഞ്ചേരി: യുവാവിനെ തട്ടിക്കൊണ്ടുപോയി 13 ലക്ഷം രൂപ കവര്‍ന്ന സംഭവത്തില്‍ തൃശൂര്‍ കേന്ദ്രീകരിച്ചു പ്രവര്‍ത്തിക്കുന്ന 10 അംഗ ക്വട്ടേഷന്‍ സംഘത്തിലെ ഒരാള്‍ മഞ്ചേരി പൊലിസിന്റെ പിടിയിലായി. തൃശൂര്‍ ചന്ദനക്കുന്ന് സ്വദേശി നടുവത്ത് ജിതേഷ് (27) ആണ് പിടിയിലായത്.
മലപ്പുറം, കോഴിക്കോട്, വയനാട് ജില്ലകള്‍ കേന്ദ്രീകരിച്ചു നടന്ന നിരവധി കവര്‍ച്ചാ കേസുകള്‍ക്ക് ഇതോടെ തുമ്പായി. ക്വട്ടേഷന്‍ സംഘത്തില്‍ ഉള്‍പ്പെട്ട അരിക്കോട് സ്വദേശി അക്ഷയ്, സംഘങ്ങള്‍ക്കു പണം കൊണ്ടുപോകുന്ന ആളുകളെക്കുറിച്ച് വിവരം നല്‍കുന്ന വള്ളുവമ്പ്രം സ്വദേശി നൗഷാദ് എന്നിവരെ പ്രത്യേക അന്വേഷണ സംഘം കഴിഞ്ഞ ദിവസം പിടികൂടിയിരുന്നു. രഹസ്യവിവരത്തിന്റെ അടിസ്ഥാനത്തില്‍ മഞ്ചേരി സി.ഐ ബിജുവിന്റെ നേതൃത്വത്തില്‍ എസ്.ഐ കൈലാസ് നാഥ്, പ്രത്യേക അന്വേഷണ സംഘാംഗങ്ങളായ പി. സഞ്ജീവ്, ശ്രീകുമാര്‍, സജയന്‍, സലിം, സുഭാഷ്, ജോഷി തൃശൂര്‍ എന്നിവരാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.