ചങ്ങരംകുളം: കാറിലെത്തിയ സംഘം വീടുകയറി അക്രമം നടത്തിയെന്ന പരാതിയില്‍ രണ്ടു പേര്‍ക്കെതിരേ ചങ്ങരംകുളം പൊലിസ് കേസെടുത്തു. എടപ്പാള്‍ സ്വദേശികളായ ആഷിഷ് (25), വിഷ്ണു (26) എന്നിവര്‍ക്കെതിരേയാണ് എസ്.ഐ കെ.പി മനേഷ് കേസെടുത്തത്.
കഴിഞ്ഞ ദിവസം വൈകിയിട്ട് ആറോടെ കാറിലെത്തിയ സംഘം കീഴ്പ്പട വളപ്പില്‍ രവീന്ദ്രന്റെ വീട്ടില്‍ കയറി അക്രമം നടത്തിയെന്നാണ് പരാതി. ഓടിക്കൂടിയ നാട്ടുകാര്‍ സംഘത്തെ തടഞ്ഞുവച്ച് വിവരമറിയിച്ചതനുസരിച്ച് പൊലിസെത്തി ഇവരെ കസ്റ്റഡിയിലെടുക്കുകയായിരുന്നു. സംഭവത്തില്‍ പരുക്കേറ്റ മൂന്നു പേരെ ചങ്ങരംകുളത്തെ ആശുപത്രിയില്‍ പ്രവേശിപ്പിച്ചിരിക്കുകയാണ്. കോളജില്‍ സഹോദരിയെ ശല്യം ചെയ്യുന്നത് ചോദ്യം ചെയ്യാനെത്തിയതാണ് സഹോദരന്‍മാരായ എടപ്പാള്‍ സ്വദേശികളെന്നും പ്രകോപനമുണ്ടായപ്പോള്‍ സംഘര്‍ഷത്തിലെത്തുകയായിരുന്നെന്നുമാണ് പൊലിസ് പറയുന്നത്.