കിഴിശ്ശേരി: ഫ്യൂസ് കാരിയര്‍ ബോക്‌സ് അപകട ഭീഷണിയുയര്‍ത്തുന്നതായി പരാതി. കിഴിശ്ശേരി തവനൂര്‍ മുണ്ടണ്ടിലാക്കല്‍ അമ്പലപ്പടിയില്‍ സ്ഥാപിച്ച ട്രാന്‍സ്‌ഫോര്‍മറിന്റെ ഫ്യൂസ് കാരിയര്‍ ബോക്‌സാണ് ജനങ്ങള്‍ക്ക് അപകട ഭീഷണിയുയര്‍ത്തുന്നത്. മതിയായ സുരക്ഷ സംവിധാനങ്ങള്‍ ഒരുക്കാതെയാണ് ഫ്യൂസുകള്‍ സ്ഥാപിച്ചിരിക്കുന്നത്. നാട്ടുകാര്‍ ഭീതിയോടെയാണ് ഇതുവഴി സഞ്ചരിക്കുന്നത്.
ചെറിയ കുട്ടികള്‍ക്ക് പോലും എത്തിപ്പിടിക്കാവുന്ന അവസ്ഥയിലാണ് ഇത് റോഡ് സൈഡില്‍ സ്ഥാപിച്ചിരിക്കുന്നത്. ദിവസങ്ങള്‍ക്കു മുമ്പ് ഇതില്‍ നിന്നു വിദ്യാര്‍ഥികള്‍ക്ക് വൈദ്യുതാഘാതമേറ്റിട്ടും അധികൃതര്‍ നടപടിയൊന്നുമെടുത്തില്ലെന്ന് പ്രദേശവാസികള്‍ ആരോപിക്കുന്നു. സമീപത്തെ സ്‌കൂള്‍- മദ്‌റസ വിദ്യാര്‍ഥികള്‍ ഉള്‍പ്പടെ നിരവധി പേര്‍ സദാസമയവും നടക്കുന്ന റോഡിനോട് ചേര്‍ന്നാണ് സുരക്ഷകളൊന്നുമില്ലാതെ ഫ്യൂസ് പെട്ടി നില്‍ക്കുന്നത്. നിരവധി തവണ ആശങ്ക ബന്ധപ്പെട്ടവരെ അറിയിച്ചിട്ടും നടപടിയൊന്നും സ്വീകരിച്ചിട്ടില്ല. കാലപ്പഴക്കംമൂലം ദ്രവിച്ച് പൊളിഞ്ഞു വീഴാറായ ഇതിന്റെ വാതിലുകളും തകര്‍ന്നു പോയിട്ടുണ്ടണ്ട്. റോഡരികില്‍ സ്ഥിതിചെയ്യുന്ന ഈ ഫ്യൂസ് പെട്ടിക്ക് വാതിലുകള്‍ സ്ഥാപിക്കാന്‍ നാട്ടുകാര്‍ നിരവധി തവണ ആവശ്യപ്പെട്ടങ്കിലും നടപടിയുണ്ടായിട്ടില്ല. റോഡരികില്‍ യാതൊരു സുരക്ഷയുമില്ലാതെ നിലകൊള്ളുന്ന ഫ്യൂസ് ക്യാരിയര്‍ ബോക്‌സ് സുരക്ഷിതമായ മറ്റൊരു സ്ഥലത്തേക്ക് മാറ്റി സ്ഥാപിക്കണമെന്നാണ് നാട്ടുകാരുടെ ആവശ്യം.