ആലുവ: വീട് കുത്തിത്തുറന്ന് 100 പവനും ഒരു ലക്ഷം രൂപയും കവര്‍ന്നു. ആലുവ മഹിളാലയം കവലയില്‍ പടിഞ്ഞാറേ പറമ്പില്‍ അബ്ദുല്ലയുടെ വീട്ടില്‍ നിന്നാണ് സ്വര്‍ണം കവര്‍ന്നത്. വീട്ടില്‍ ആളില്ലാത്ത സമയത്തായിരുന്നു മോഷണം. ഇന്നലെ രാവിലെ ഇവരുടെ കുടുംബം മമ്പുറത്ത് സന്ദര്‍ശനത്തിന് പോയതായിരുന്നു.
രാത്രി വീട്ടില്‍ തിരിച്ചെത്തിയപ്പോഴാണ് മോഷണ വിവരം അറിയുന്നത്. വീടിന് പിന്നിലെ വാതിലിന്റെ പൂട്ട് തകര്‍ത്താണ് മോഷ്ടാവ് അകത്തു കടന്നത്. വാക്കത്തിയും പിക്കാസും വീടിനകത്ത് കണ്ടെത്തി. വീട്ടിലെ വസ്തുക്കള്‍ വലിച്ചു വാരി പരിശോധിച്ച നിലയിലാണ്. വിവാഹ ആവശ്യത്തിന് ലോക്കറില്‍ നിന്ന് എടുത്തതായിരുന്നു സ്വര്‍ണം. ഡി.വൈ.എസ്.പി ജയരാജ്, എസ്.ഐ യാക്കോബ് എന്നിവരുടെ നേതൃത്വത്തില്‍ പൊലിസ് പരിശോധന നടത്തി.