ചെങ്ങന്നൂര്‍: കഴിഞ്ഞ ദിവസം അന്തരിച്ച അഡ്വ.കെ.കെ രാമചന്ദ്രന്‍നായര്‍ എം.എല്‍.എയ്ക്ക് നാടിന്റെ അന്ത്യാഞ്ജലി. ഔദ്യോഗിക ബഹുമതികളോടെയായിരുന്നു സംസ്‌കാരം. വീടിനു സമീപം ഒരുക്കിയ പ്രത്യേക സ്ഥലത്ത് രാത്രി 7.20 ഓടെ മകന്‍ പ്രശാന്ത് ചിതയ്ക്ക് തീ കൊളുത്തി. മുഖ്യമന്ത്രി പിണറായി വിജയന്‍, സ്പീക്കര്‍ പി. ശ്രീരാമകൃഷ്ണന്‍, പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ചാണ്ടി, സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍, ഭരണ പരിഷ്‌കാര കമ്മിഷന്‍ ചെയര്‍മാന്‍ വി.എസ് അച്യുതാനന്ദന്‍ ഉള്‍പ്പടെയുള്ള നേതാക്കളും മന്ത്രിമാരും എം.എല്‍.എമാരും ഉദ്യോഗസ്ഥ പ്രമുഖരും സാമൂഹിക- സാംസ്‌കാരിക- സന്നദ്ധ സംഘടനാ ഭാരവാഹികളും ഉള്‍പ്പെടെ നിരവധി പേര്‍ അന്തിമോപചാരം അര്‍പ്പിച്ചു.