കടുത്തുരുത്തി: കടുത്ത വരള്‍ച്ച മൂലം ഉണ്ടായിരിക്കുന്ന പ്രതിസന്ധി പരിഹരിക്കുന്നതിന് മലങ്കര ഡാം തുറന്ന് മൂവാറ്റുപുഴ വാലി ഇറിഗേഷന്‍ പ്രോജക്ടിന്റെ കനാലിലൂടെ ഇന്നു മുതല്‍ പരീക്ഷണാടിസ്ഥാനത്തില്‍ ജലവിതരണം നടത്താന്‍ തീരുമാനിച്ചതായി മോന്‍സ് ജോസഫ് എം.എല്‍.എ. അറിയിച്ചു.
വൈദ്യുതി ഉല്‍പ്പാദനത്തിന് ആവശ്യമായ വെള്ളം ഇടുക്കി ഡാമിലും മലങ്കര ഡാമിലും ഇല്ലാത്തതുമൂലമാണ് ഇതുവരെ കനാല്‍ തുറക്കാന്‍ കഴിയാഞ്ഞത്. എന്നാല്‍ ഇപ്പോള്‍ ഡാമിലെ വെള്ളത്തിന്റെ അളവ് 40.8 മീറ്ററിലേക്ക് ഉയര്‍ന്നതിനെ തുടര്‍ന്നാണ് പരീക്ഷണാടിസ്ഥാനത്തില്‍ മലങ്കര ഡാം തുറക്കുന്നതിനും ജലവിതരണം നടത്തുന്നതിനും തീരുമാനിച്ചതെന്ന് മോന്‍സ് ജോസഫ് എം.എല്‍.എ. വ്യക്തമാക്കി.
ഡാമില്‍ മിനിമം ആവശ്യമായ വെള്ളത്തിന്റെ അളവ് 40.5 മീറ്ററാണ്. ഈ അളവിലെത്തുന്നതുവരെ ആയിരിക്കും ജലവിതരണം നടത്തുന്നത്. ഇതിലൂടെ ലഭ്യമാകുന്ന വെള്ളം ഒഴുകി എത്തുന്നിടത്തോളം സ്ഥലങ്ങളിലായിരിക്കും ആദ്യഘട്ടത്തില്‍ ജലവിതരണം നടത്താന്‍ കഴിയുന്നതെന്ന് എം.വി.ഐ.പി. അധികൃതര്‍ പറഞ്ഞു. മലങ്കര ഡാമിനും വെള്ളത്തിന്റെ അളവ് വര്‍ദ്ധിക്കുന്നതനുസരിച്ച് കൂടുതല്‍ സ്ഥലങ്ങളിലേക്ക് ജലവിതരണം നടത്താന്‍ കഴിയുമെന്നാണ് പ്രതീക്ഷിക്കുന്നത്.