കൊല്ലം: എക്‌സൈസിന്റെ കഞ്ചാവ് വേട്ടയ്ക്കിടെ വില്‍പ്പനക്കാരന്റെ കുത്തേറ്റ് ഏഴ് ഉദ്യോഗസ്ഥര്‍ക്ക് പരിക്ക്. ആക്രമണത്തിനിടെ പ്രതിയെ എക്‌സൈസ് പിടികൂടി. എക്‌സൈസ് കൊല്ലം റേഞ്ച് ഇന്‍സ്‌പെക്ടര്‍ എ അനില്‍കുമാര്‍,അസി. ഇന്‍സ്‌പെക്ടര്‍മാരായ ബി സന്തോഷ്,ടി സുരേന്ദ്രന്‍പിള്ള,സിവില്‍ എക്‌സൈസ് ഓഫീസര്‍മാരായ അഖില്‍,തസല്‍ം,ശരത്,മനീഷ് എന്നിവര്‍ക്കാണ് പരിക്കേറ്റത്്. ഇവരെ ജില്ലാ ആശുപത്രിയില്‍ പ്രവേശിപ്പിച്ചു.
ഇന്നു രാവിലെ കരിക്കോട് പഴയ ബസ് സ്റ്റാന്റിനു സമീപമായിരുന്നു സംഭവം. കുപ്രസിദ്ധ കഞ്ചാവു വില്‍പ്പനക്കാരന്‍ മീശമാധവന്‍ എന്നുവിളിക്കുന്ന ഷംനാദ് (24) ആണ് പിടിയിലായത്. കരിക്കോട് ഭാഗങ്ങളില്‍ ഇതരസംസ്ഥാന തൊഴിലാളികള്‍ക്കു ഇയാള്‍ കഞ്ചാവ് വില്‍പ്പന നടത്തുന്നുണ്ടെന്ന വിവരത്തെ തുടര്‍ന്നാണ് എക്‌സൈസ് സംഘം പരിശോധനക്കെത്തിയത്. സമീപത്തുകിടന്ന ബിയര്‍ കുപ്പി പൊട്ടിച്ചായിരുന്നു ആക്രമണം. കഞ്ചാവ് ലഹരിയിലായിരുന്നു. മോഷണം,അടിപിടി തുടങ്ങിയ കേസുകളിലും ഇയാള്‍ പ്രതിയാണ്. 34 ഗ്രാം കഞ്ചാവ് പ്രതിയില്‍ നിന്നും കണ്ടെടുത്തു.