ചെന്നൈ: ശശികലയെ നിയമസഭാ കക്ഷി നേതാവായി തെരഞ്ഞെടുത്ത അണ്ണാഡിഎംകെ എംഎല്‍എമാരുടെ യോഗത്തില്‍ നാല് വെള്ളക്കടലാസുകളില്‍ ഒപ്പിട്ടുവാങ്ങിയതായി അണ്ണാഡിഎംകെ എംഎല്‍എയുടെ വെളിപ്പെടുത്തല്‍.

പനീര്‍ശെല്‍വത്തിന് പിന്തുണ പ്രഖ്യാപിച്ച ഷോളവന്താന്‍ എംഎല്‍എ കെ മാണിക്യമാണ് യോഗത്തില്‍ ഒപ്പു ശേഖരണം നടത്തിയതായി വെളിപ്പെടുത്തിയത്.

എന്താണ് യോഗം വിളിച്ചതിന്റെ ഉദ്ദേശം ഞങ്ങള്‍ക്കറിയില്ലായിരുന്നു.ശനിയാഴ്ചയാണ് യോഗമുണ്ടെന്ന കാര്യം ഞങ്ങളെ അറിയിച്ചത്. മണ്ഡലങ്ങളിലെ പ്രശ്‌നങ്ങള്‍ പരിശോധിക്കാന്‍ സാധാരണ വിളിച്ച് ചേര്‍ക്കുന്ന യോഗമെന്നാണ് പറഞ്ഞത്.യോഗത്തില്‍ പെട്ടെന്ന് പനീര്‍ശെല്‍വം രാജിപ്രഖ്യാപിച്ചപ്പോള്‍ ഞങ്ങളെല്ലാം ഞെട്ടിത്തരിച്ചുവെന്നും മാണിക്യം ഒരു ദേശീയ ചാനലിനോട് പറഞ്ഞു.

ജയലളിത മരിച്ച രാത്രിയില്‍ എംഎല്‍എമാരില്‍ നിന്നും സമാനമായ രീതിയില്‍ വെള്ളകടലാസില്‍ ശശികലയും സംഘവും ഒപ്പിട്ടുവാങ്ങിയിരുന്നു. ഇത് വിവാദങ്ങള്‍ക്ക് ഇടയാക്കുകയും ചെയ്തിരുന്നു.

കഴിഞ്ഞ ഞായറാഴ്ച നടന്ന എംഎല്‍എമാരുടെ യോഗത്തിലാണ് ശശികലയെ നിയമസഭ കക്ഷിനേതാവായി തെരഞ്ഞെടുത്തത്.