കൊച്ചി: ഗോവയിലേറ്റ അടിക്ക് സ്വന്തം നാട്ടില്‍ തിരിച്ചടി നല്‍കാമെന്ന ബ്ലാസ്റ്റേഴ്‌സിന്റെ ആഗ്രഹത്തിന് തിരിച്ചടി. കളി മറന്നുപോയ ബ്ലാസ്റ്റേഴ്‌സിന് സ്വന്തം നാട്ടിലും പരാജയം രുചിക്കേണ്ടി വന്നു.
മനോഹരമായ കാല്‍പന്തുകളിയുടെ വിരുന്നൊരുക്കി കൊച്ചിയുടെ കളിത്തട്ടിലും എഫ്.സി ഗോവ 2-1 ന് കേരള ബ്ലാസ്റ്റേഴ്‌സിനെ അടിയറവ് പറയിച്ചു.

ഏഴാം മിനുറ്റില്‍ സൂപ്പര്‍ താരം ഫെറാന്‍ കൊറോമിനസും 77ാം മിനുറ്റില്‍ ബ്രണ്ടന്‍ ഫെര്‍ണാണ്ടസുമാണ് ഗോവയ്ക്കായി ഗോള്‍ നേടിയത്. 29ാം മിനുട്ടില്‍ സി.കെ വിനീതിലൂടെയായിരുന്നു ബ്ലാസ്റ്റേഴ്‌സിന്റെ ആശ്വാസ ഗോള്‍. ഗോവയില്‍ 5-2 ന്റെ തോല്‍വി വഴങ്ങിയ ബ്ലാസ്റ്റേഴ്‌സ് കൊച്ചിയില്‍ 2-1നാണ് തോല്‍വി വഴങ്ങിയത്. ബ്ലാസ്റ്റേഴ്‌സ് വീണ്ടും തോറ്റതോടെ ഒരു സ്ഥാനം പിന്നിലേക്കിറങ്ങി ഏഴിലേക്ക് വീണു.

ജംഷഡ്പൂര്‍ എഫ്.സി ഡല്‍ഹിയെ തോല്‍പ്പിച്ചതോടെയാണ് ബ്ലാസ്റ്റേഴ്‌സ് ഒരു സ്ഥാനം പിന്നിലേക്ക് ഇറങ്ങിയത്. ഗോവ 10 കളികളില്‍ നിന്ന് 19 പോയിന്റ് നേടി ആദ്യ നാലില്‍ ഉറച്ചു നിന്നു. തുടര്‍ച്ചയായ രണ്ട് തോല്‍വികളോടെ കേരളത്തിന്റെ സെമി സാധ്യതയും മങ്ങി.