മോസ്‌കോ: പടിഞ്ഞാറിന്റെ റഷ്യന്‍ഭീതി ശീതകാലത്തിനേക്കാളും ശക്തമായിരിക്കുകയാണെന്ന് റഷ്യന്‍ വിദേശകാര്യമന്ത്രി സെര്‍ജി ലാവ്‌റോവ്. മുന്‍പെങ്ങുമില്ലാത്ത വിധം ശക്തമാണ് നിലവിലെ പടിഞ്ഞാറന്‍ രാജ്യങ്ങളുടെ ഭീതി. ശീതകാലത്തു പോലും തങ്ങള്‍ ഇത്തരത്തിലൊന്ന് കണ്ടിട്ടില്ലെന്നും അദ്ദേഹം പറഞ്ഞു.
ന്യൂയോര്‍ക്ക് സന്ദര്‍ശനത്തിനു മുന്നോടിയായി റഷ്യന്‍ ദിനപ്പത്രത്തിനു നല്‍കിയ അഭിമുഖത്തിലാണ് സെര്‍ജി ലാവ്‌റോവ് ഇക്കാര്യം വ്യക്തമാക്കിയത്. മുന്‍പ് ഇക്കാര്യത്തില്‍ ചില ഔചിത്യങ്ങളൊക്കെയുണ്ടായിരുന്നു. എന്നാലിന്ന് ഈ വിഷയത്തില്‍ യാതൊരു ഔചിത്യവുമില്ലാത്ത അവസ്ഥയാണ്. സാധ്യമായ എല്ലാ വിധത്തിലും റഷ്യയെ ശിക്ഷിക്കുകയാണ് ലക്ഷ്യം. യു.എസിനെയും യൂറോപ്യന്‍ യൂനിയനെയും കുറ്റപ്പെടുത്തിക്കൊണ്ടായിരുന്നു സെര്‍ജി ലാവ്‌റോവിന്റെ പ്രതികരണം. യു.എസും യൂറോപ്യന്‍ യൂനിയനും ചേര്‍ന്നെടുത്ത ഉപരോധം അടിസ്ഥാനമില്ലാത്തതാണ്. അദ്ദേഹം പറഞ്ഞു.
അടുത്ത മാസം ദക്ഷിണകൊറിയയിലെ പ്യോങ്‌യാങില്‍ നടക്കുന്ന ശീതകാല ഒളിംപിക്‌സില്‍ നിന്ന് അന്താരാഷ്ട്ര ഒളിംപിക്‌സ് കമ്മിറ്റി റഷ്യയെ സസ്‌പെന്‍ഡ് ചെയ്തിരിക്കുകയാണ്. റഷ്യയില്‍നിന്നുള്ള അത്‌ലറ്റുകള്‍ക്കാര്‍ക്കും നിലവില്‍ ഒളിംപിക്‌സില്‍ പങ്കെടുക്കാനാകാത്ത സാഹചര്യമാണ്. ഇതിന്റെ പശ്ചാത്തലത്തിലാണ് സെര്‍ജി ലാവ്‌റോവിന്റെ പ്രതികരണം. 2014ല്‍ റഷ്യ ആതിഥേയത്വം വഹിച്ച ശീതകാല ഒളിംപിക്‌സില്‍ സര്‍ക്കാരിന്റെ അറിവോടെ അത്‌ലറ്റുകള്‍ക്ക് ഉത്തേജകമരുന്ന് നല്‍കി എന്ന ആരോപണവുമായി ബന്ധപ്പെട്ടുള്ള അന്വേഷണമാണ് നിരോധനത്തിലേക്ക് വഴിതെളിച്ചത്.
അതേസമയം തങ്ങള്‍ ശുദ്ധരാണെന്നു തെളിയിക്കാന്‍ കഴിയുന്ന റഷ്യന്‍ താരങ്ങള്‍ക്ക് ഒളിംപിക് അത്‌ലറ്റ് ഫ്രം റഷ്യ എന്ന ലേബലില്‍ ഒളിംപിക്‌സില്‍ പങ്കെടുക്കാന്‍ അനുമതി നല്‍കും.