ചിറ്റൂര്‍: കനത്ത വരള്‍ച്ചയില്‍ മേഖലയിലെ വാഴക്കൃഷികളും നശിച്ചുതുടങ്ങി. പട്ടഞ്ചേരി,പെരുമാട്ടി പഞ്ചായത്തുകളിലെ വാഴകര്‍ഷകരും ദുരിതത്തിലേക്ക്. നെല്‍കൃഷി പൂര്‍ണമായി നടത്താന്‍ സാഹചര്യത്തില്‍ കാലവര്‍ഷം കനിയുമെന്ന് പ്രതീക്ഷിച്ചാണ് കുറെ കര്‍ഷകര്‍ വാഴ കൃഷിയിലേക്ക് ഇറങ്ങിയത്. വാഴകള്‍ കുലച്ച് പാതിമുപ്പത്തിയ അവസ്ഥയിലുമാണ്.
കുളങ്ങളെയും കിണറുകളെയും ആശ്രയിച്ച് വര്‍ഷങ്ങളായി കൃഷിയിറക്കിയവര്‍ കുളങ്ങള്‍ വററിയതോടെ വെട്ടിലായി. സ്വന്തമായും പാട്ടത്തിനും കൃഷിയിറക്കുന്നവര്‍ ഈ മേഖലയിലുണ്ട്. നാളികേര കര്‍ഷകര്‍ ഇടവിളയായും വാഴക്കൃഷി ചെയ്യുന്നുണ്ട് അതിനും ഉണക്കം ബാധിച്ചു തുടങ്ങിയിട്ടുണ്ട്.
കനാലുകളിലൂടെയുള്ള കൃത്യമായ ജലസേചനം ഉറപ്പാക്കാന്‍ കഴിയാത്തതാണ് ഇപ്പോഴത്തെ വാഴകര്‍ഷകരുടെ ദുരിതത്തിനും കാരണം. പാതിപോലും മൂപ്പെത്താത്ത നേന്ത്രന്‍ കായകള്‍ വില്‍ക്കാനും പറ്റില്ല.
ഒരുവാഴ കുലയ്ക്കുന്നതുവരെ വളര്‍ത്തണമെങ്കില്‍ 120 രൂപ ചിലാവുണ്ടെന്നാണ് കര്‍ഷകര്‍ പറയുന്നത്. പെരുമാട്ടി പഞ്ചായത്തിലെ പുറയോരത്തെ ഒരു കര്‍ഷകന് മാത്രം മൂന്നര ഏക്കറില്‍ കൃഷിചെയ്ത 4500 വാഴകളും നശിച്ചു. കുളത്തില്‍ വെള്ളമില്ലാത്തതിനാല്‍ ബാക്കിയുള്ളവയും നാശത്തിന്റെ വക്കത്താണ്.
പഞ്ചായത്തികളുടെ വിവിധ പ്രദേശങ്ങളിലായിയുള്ള മുന്നൂറ് ഏക്കറോളം വാഴക്കൃഷി ഇപ്പോള്‍ ഉണക്ക ഭീഷണിയിലുമാണ്. വായ്പ്പയെടുത്ത് കൃഷിയിറക്കിയ കര്‍ഷകര്‍ക്ക് തിരിച്ചടവിന് സമയമായിത്തുടങ്ങിയിട്ടുമുണ്ട്. കാലവര്‍ഷം കനിഞ്ഞില്ലെങ്കില്‍ നെല്‍വയലിനോടൊപ്പം വാഴയും തെങ്ങും നശിക്കും.